‘Klipmoordenaar’ getuig

“Sy het my aangerand en toe het ek haar ook aangerand.”

So het die moordbeskuldigde, Jeremia Erwin Nowaseb, gister (Donderdag) in die hoërhof in Windhoek tydens kruisondervraging getuig.

“Sy het met my begin baklei. Sy het my stamp en my probeer verwurg. Daarna het sy ’n klip opgetel en my daarmee begin slaan. Ek het die klip by haar afgevat en haar geslaan.”

Hoewel Nowaseb beweer hy het sy 20-jarige meisie, Christina Kooper, slegs twee keer met die klip geslaan, het ’n dokter tydens die verhoor getuig dat hy haar ten minste vyf keer moes geslaan het om die beserings te veroorsaak wat tot haar dood gelei het.

Kooper is dood weens interne bloeding op haar brein. Sy en Nowaseb het ook ’n minderjarige dogter gehad.

Die voorval het op 31 Oktober 2020 in die informele nedersetting Nuwerus op Aranos plaasgevind.

“Dit was nie my bedoeling om haar dood te maak nie. Ek wou net aan haar doen wat sy aan my gedoen het,” het hy getuig.

Die staatsaanklaer, Ethel Ndlovu, het tydens kruisondervraging dié bewering verwerp en aangevoer dat hy haar met opset vermoor het.

VERNEUK

Nowaseb het getuig hy het dié noodlottige dag terug huis toe gekom ná hy op ’n plaas in die omgewing gewerk het.

Hy was glo ontsteld toe hy Kooper in ’n sjebeen gekry het waar sy besig was om te dans. Kooper het na bewering hulle dogter, wat toe twee jaar oud was, by die huis in iemand anders se sorg gelos.

“Ek was kwaad oor die feit dat sy ons dogtertjie by die huis gelos het om by ’n sjebeen te dans.”

Gerugte het glo ook die ronde gedoen dat sy hom verneuk het en toe hy haar daaroor uitvra, het sy na bewering vir hom gelag.

“Ek het nie goed gevoel oor die feit dat sy vir my gelag het nie.”

Die volgende oggend was hulle reeds omstreeks 09:00 by ’n sjebeen waarna hulle ’n boks wyn gekoop en na ’n nabygeleë rivieroewer gegaan het.

Nowaseb het erken hulle was dronk en ’n bakleiery het tussen hulle ontstaan. Hy het haar tydens die onderonsie met ’n klip geslaan.

Sy was glo nog nie dood nie en hy het haar na bewering tot onder ’n boom gedra. Sy het hom glo gevra vir water en hy het water gaan soek. Volgens hom kan hy nie verder onthou wat gebeur het nie.

Hy het haar egter daarna by die polisie as vermis aangemeld en die polisie het later haar liggaam gevind. Nowaseb het eers daarná ’n bekentenis by die polisie afgelê.

GETUIES

’n Sestienjarige meisie het in Julie vir die staat getuig en aangevoer dat sy die dag van die voorval gesien het hoe Nowaseb die oorledene geslaan het.

Dit was glo naby dieselfde boom waar die moord later plaasgevind het. Nowaseb ontken egter dié bewering.

– [email protected]

Verwante artikels:

‘EK WOU HAAR NIE DOODMAAK’

VERHOOR OOR GRUSAME KLIPMOORD HERVAT