Stormsterk ooswinde rig skade aan

Stormsterk ooswind-toestande het gister Namibië se kusdorpe verrinneweer. Op Lüderitz het ’n vissersboot op die rotse beland en in Swakopmund is duisende dollars se skade aan infrastruktuur aangerig.Volgens mnr. Phil Balhao van Lüderitz het die wind Sondagnag omstreeks 04:00 sterk begin waai en teen gistermiddag nog nie bedaar nie.“Hy het gewaai, maar so teen 04:00 het die dakke begin raas en die stormsterk wind het begin waai, wat nou nog nie opgehou het nie. Dit is chaos. Die sand waai ons deurmekaar. Sulke sterk ooswinde is ongewoon. Selfs die klippe is al die see ingewaai,” het hy spottenderwys gesê. Die ketting wat die vissersboot Nelita geanker het, het in die wind gebreek en die boot het by Shark-eiland op die rotse te lande gekom.“Ons kon nog glad nie by die Nelita uitkom nie, aangesien die wind nog te sterk waai. Ons moet wag tot die wind bedaar en dit veilig is om soontoe te gaan. Dan sal ons die omvang van die skade kan bereken en of ons enigiets kan red,” het mnr. Jose Calaca, die eienaar van die boot, gesê. Hy is hoopvol die wind sal ietwat bedaar sodat hulle by die boot kan uitkom en ondersoek kan instel. Die B4-pad tussen Aus en Lüderitz is vroeg gisteroggend vir verkeer gesluit en talle vragmotors wat mangaan vervoer moes wag terwyl stootskrapers ingespan is om die sandduine wat op die teerpad gevorm het, te verwyder. “Die pad is later vir verkeer oopgemaak hoewel die wind aanhoudend sand oor die pad gewaai het. Sandduine het die hele oggend keer op keer oor die pad gevorm en die manne het aangehou om teen die sand te baklei. Hulle sal die hele dag so veg totdat die wind hopelik laat namiddag ietwat gaan lê,” het Balhao gesê. SWAKOPMUNDIntussen berig Adam Hartman van Swakopmund dat inwoners die wind as die sterkste wind in eeue beskryf. Die wind het groot skade aangerig. Mure en heinings het omgewaai en in een voorval het ’n muur op ’n voertuig geval. Dakteëls is afgewaai, boomtakke het afgebreek en restauranttoerusting het omgewaai. Verkeersligte en straatborde het ook deurgeloop. Die Privaat Skool Swakopmund het sy kinders en personeel huis toe gestuur. Die skool het in ’n brief aan ouers verduidelik dat die wind na verwagting nie teen môre of Woensdag sal bedaar nie en dat hulle die skool moet skoonmaak. Dus sal die skool eers Donderdag weer oopmaak.“Ons vra om verskoning vir die ongerief veral vir die ouers van Walvisbaai wat deur die sterk wind gery het om hul kinders by die skool te kry en wat ons moes wegwys. Ons is baie jammer,” lui die brief. Verskeie restaurante en koffiewinkels het hul eksterne dienste gesluit. Woestyntoer- en vlugoperateurs moes hul toere kanselleer. Behalwe vir die sterk wind was die stof oral – en plek-plek so dik by tye dat dit moeilik was om asem te haal en te sien. Sigbaarheid is sodanig verminder dat voertuie helder oordag met kopligte aan gery het. Huise en winkels moes deure en vensters, en selfs luggate, toemaak om die stof uit te hou, maar dit was byna onmoontlik. Stof en sand het oral ingekom en alles bedek.“Dit is ’n oorlas, maar dit is heerlik – dit herinner ons daaraan dat ons in die woestyn woon – in die middel van die winter,” het ’n sake-eienaar gesê. “Dit sal nie vir ewig aanhou nie.” Verskeie bronne voorspel dat die wind tot Donderdag kan voortduur. Die Namibië Meteorologiese Dienste voorspel “sonnig en baie warm weer met enkele sandstorms” vir die sentrale kus.Temperature word voorspel om in die omgewing van 30 grade Celcius te wees. Ander bronne dui daarop dat Maandag se wind van 38 knope (sowat 70 km/h) die ergste vir die week was. Rukwinde van tot 32 knope (sowat 59km/h) sal tot Donderdag voortduur. Van Donderdagmiddag af sal die weer weer koeler raak.

Stormsterk ooswinde rig skade aan

Kommentaar

Republikein 2025-11-05

Meld asseblief aan om kommentaar te lewer

Stormsterk ooswinde rig skade aan

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.