Namibië juig oor reën

Terwyl die Namibiese weerkantoor teen verdere swaar reën vir vandag in die noordwestelike, sentrale noordelike en Zambezistreek waarsku, het goeie reënneerslae die afgelope naweek op verskeie plekke in die land voorgekom. Volgens die weerkantoor se amptelike reënsyfers, soos gemeet gisteroggend om 08:00, het Oshikango die meeste reën gehad, met 81,2 mm wat gemeet is. Dit word gevolg deur Okongo, met 70,9 mm reën en die Internasionale Lughawe Hosea Kutako, waar dit 69,4 mm gereën het. Dit het onderskeidelik 62 mm en 50 mm by die Onghwiyu no. 1- en die Brandwagth-weerstasie gereën. Die weerkantoor het gisteroggend ook 31,4 mm reën op die Katima Mulilo-lughawe gemeet, 30 mm op beide Otavi en Klein Dabaras asook 26 mm op beide Hohenfelde en Grootfontein. Oshakati het 24 mm reën ontvang, Düsternbrook 20 mm en Otjiwarongo 18,4 mm. By die Eros-lughawe is 12,8 mm reën gemeet en op Outjo 10,6 mm.Op die Facebook-groep, Reën in Namibia, het lede laat weet 83,5 mm reën is gisteroggend net suid van Hosea Kutako gemeet, terwyl sowat 22 mm in Windhoek-Wes gemeet is. In die Omusatistreek is daar gister 16 mm op Eunda gemeet, terwyl Karibib Saterdag 3 mm reën gehad het, met erge winde. Vrydag het daar ook 40 mm oos van Rundu geval, terwyl Grootfontein sedert Donderdag altesaam 55 mm reën ontvang het. Tsumeb het Donderdag 70 mm reën gehad, terwyl nog iemand laat weet het suid van Otjiwarongo het dit verlede week, tot Vrydag, altesaam 95 mm gereën.VOORUITSIGTEDie weerkantoor verwag vir vandag gedeeltelik bewolkte en bloedig warm weer, met enkele donderbuie in die ||Kharas- en Omahekestreek. Elders sal dit gedeeltelik bewolk en bloedig warm wees, met geïsoleerde donderbuie, maar verspreide tot wydverspreide donderbuie in die noordweste, sentrale noorde asook die Zambezistreek. Die onafhanklike landbouweerkundige, Johan van den Berg, het onlangs aan Republikein gesê in die laaste week van Januarie kan dié goeie reën in die noorde van die land verder suidwaarts asook in ’n suidoostelike rigting uitbrei. “Dit lyk asof daar veral in Februarie nog reën kan voorkom oor veral die sentrale en noordelike dele van Namibië, terwyl ons in Maart en April dalk ondergemiddelde reën sal hê.”Van den Berg sê daar is egter nog onsekerheid oor langtermynvooruitsigte. “Die La Niña-weerverskynsel het begin verswak, maar stadiger as wat die meeste voorspellings aangedui het. “Oor die langtermyn sal ons waarskynlik vanaf die winter neutrale Enso-toestande ervaar, terwyl daar selfs ’n moontlikheid is dat El Niño-toestande kan intree.”Dit volg nadat die La Niña-weerverskynsel vir drie jaar lank wêreldwye weerpatrone oorheers, wat op sigself ’n ietwat ongewone verskynsel was.Enso staan vir die El Niño- Suidelike Ossillasieklimaatspatroon en verwys na die interaksie tussen die tropiese Stille Oseaan en die atmosferiese toestande in dié gebied, wat gesamentlik ’n invloed op wêreldwye weer- en klimaatpatrone het. – elvira@republikein.com.na

Namibië juig oor reën

Kommentaar

Republikein 2025-05-02

Meld asseblief aan om kommentaar te lewer

Namibië juig oor reën

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie