Moeder Natuur saai amok

“Ek was in my kamer toe die water gekom het. Ek was so bang, ek het net gehuil en om hulp geskree,” het Anna Hoxowes, wat in Leniestraat in Ludwigsdorf woon, gesê. Ná ’n hewige reënbui Woensdagmiddag in Windhoek uitgesak het, was talle voertuie onder water en is huise oorstroom. Verskeie voertuie is deur riviere meegesleur en bome is ontwortel en het op grensmure geval.Rolf Trossbach woon oorkant die straat van Hoxowes en nadat al die mure omgeval het, het hy in sy swembroek in kniediepwater straat toe geloop. “Ek het iemand om hulp hoor roep en kon eers nie uitmaak waarvandaan dit kom nie totdat ek die hand uit die deur sien waai het. “Ek wou oor die straat loop en het geval omdat die hele grensmuur omgeval het en die stukke onder die water gelê het. Ek het versigtig vorentoe beweeg. Ek kon nie haar kamer se veiligheidshek oopkry nie omdat iets in die pad was. Maar ek het krag van iewers gekry om die hek oop te maak. Daardie klein vrou het die houtdeur oopgekry en ek kon haar uitkry,” hy gesê. LENIESTRAAT “Dit het begin hael en reën en die water het by die berg begin afstroom. Dit was ’n vloedgolf en binne vyf minute het die grensmuur omgeval en die hele erf en huis was onder water. Die water het oor die buurman se muur gestroom en toe het dit gebreek. Dit was baie water, baie vinnig,” het Chris Fourie gesê. Volgens Fourie het 115 mm in minder as 10 minute geval en vyf grensmure is deur die watermassa omgestoot. Sy vrou, Luzane, se voertuig wat in die motorhuis was, was onder water asook sy bakkie wat in die oprit gestaan het. “Die bakkie was heeltemal onder water. Ons kragboks in die motorhuis was ook onder water en dit het ons krag laat afslaan. Ons bure het later vir ons ’n elektriese verlengkoord gegee sodat ons ons motorhekalarm en yskas kon koppel en ons fone kon laai,” het Luzane gesê. Nadat Mike Bredenkamp se muur omgeval het, het die water deur Trossbach se erf gestroom. Sy muur het ook gebreek en so ook Sam Beukes en sy buurman se mure. Volgens Beukes het hy en sy vrou pas by die huis gekom toe dit begin hael het.“Ons het in die huis ingegaan omdat die kinders binne was. Die reën het begin val en dit was nie lank daarna nie toe stroom die water by die voorkant van die huis in. So vyf minute later het dit geklink asof ’n bom ontplof. Dit was toe die muur omgeval het. Ek wou die skuifdeur opmaak sodat die water deur my huis kan vloei, maar toe ek agterkom het die water borshoogte deur my erf geloop en nog twee mure omgestoot. Dit was geweldig baie water wat in ’n baie kort tyd geval het.”Trossbach skryf al sedert 2014 elke Desember ’n brief aan die munisipaliteit oor die stormwaterstelsel in die gebied wat onvoldoende is en nie skoongemaak word nie. Hy het twee weke gelede weer ’n brief aan die munisipaliteit geskryf met al die dokumentasie en bevindinge en soos elke jaar wag hy steeds op ’n antwoord van of optrede deur die munisipaliteit.OTJOMUISESean Tjano was by die werk toe die wind die dak en voorste muur van sy sinkhuis in Otjomuise weggewaai het. “Toe ek by die huis aankom, het ek gesien my huis is baie beskadig. Alles is sopnat, ook al my kos. Ek weet nie eens waar my sinkplate is nie. Ek het planne vir volgende jaar gehad. Ek het geld gespaar en wou my graad 12-punte verbeter om beter werk te kan kry, maar nou moet ek die geld gebruik om my huis te herstel.”Hy het probeer om ou spykers reguit te slaan sodat hy die sinkplate wat nog oor was, weer kon vasspyker. Tjao is nie die enigste persoon wie se dank afgewaai of beskadig is nie. Ook Claudia Ndara se dak en sinkgrensmuur is beskadig. “Op pad huis toe in die taxi het my bure my gebel en gesê daar is probleme. Ek het magteloos gevoel. Ek was bang want my agtjarige dogter was in die huis. Toe ek by die huis aangekom het, het ek gehoor die bure het haar gehelp en na hulle toe geneem. Ek is so dankbaar dat beide my kinders niks oorgekom het nie. Ja, my kos, klere, meubels, beddegoed en alles is nat. My dak is stukkend, maar ons is veilig.”Die rivier het ook talle mense in die omgewing se sinkhuise verspoel. Dit is dieselfde gemeenskap wat vroeër vanjaar ook onder vloede deurgeloop het.“Ons het op 20 November met die munisipaliteit vergader en hulle het belowe om voor die reën na ons toe terug te kom oor die verskuiwing van die mense. “Ons wag nog en intussen het daar weer talle huise verspoel van die water wat agter die bult afloop. Dié keer het die wind ook baie mense se kambashus beskadig,” het Victoria Ngaruka gesê.WERNHILOok die Wernhil-inkoopsentrum se grondvloer en onderdakparkeerterrein was onder water. “Net agter Wernhil is daar ’n hele kanaal waardeur die grootste deel van die sentrale sake gebied se stormwater gekanaliseer word. Na bewering is die oorstromings veroorsaak toe die stormwaterstelsel nie die druk van die watervloei kon hanteer nie. “In hierdie stadium is dit nie moontlik om akkurate geverifieerde syfers met betrekking tot die volle omvang van die skade aan infrastruktuur te gee nie. Ons het daarin geslaag om al die mense en huurders op die grondvloer van die winkelsentrum te ontruim. Gelukkig is geen ernstige beserings aangemeld nie,” het O&L se woordvoerder en groepbestuurder van korporatiewe betrekkinge, Roux-ché Locke, gesê.REëNVALSYFERSIntussen het talle mense reënsyfers op die Facebook-blad Reën in Namibia geplaas: Klein Windhoek 115 mm, Eros 48 mm, Ludwigsdorf 115 mm, Avis 90 mm, Suiderhof 35 mm, Windhoek Wes 110 mm, Hochlandpark 65 mm, Doradopark 76 mm, Finkenstein 63, Kapps Farm 70 mm en Omeya 21 mm. – tanja@republikein.com.na

Moeder Natuur saai amok

Kommentaar

Republikein 2026-05-05

Meld asseblief aan om kommentaar te lewer

Moeder Natuur saai amok

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.