Kunene juig, maar reën ook gevaarlik

Terwyl inwoners van die droogtegeteisterde Kunenestreek juig van blydskap nadat goeie reënbuie veral die afgelope Saterdag in die weste van die land voorgekom het, het verskeie toeriste noue ontkomings gehad. Drie vroue het Saterdag omstreeks 17:00 met ’n bakkie op die C43-pad na Epupa – 50 km van Opuwo – deur ’n rivierloop oor ’n sementbruggie gery waarna hulle wit dubbelkajuitbakkie glo afgespoel en omgeslaan het. Meer inligting oor die voorval is nog nie beskikbaar nie.Dit kom terwyl die plaaslike toergids Toni Hart ’n waarskuwing op die Facebookblad Reën in Namibia gedeel het dat toeriste in die Kunenestreek versigtig naby die rivier moet wees. “Verskeie toeriste moes reeds die afgelope week uit rivierlope gered word. Riviertjies het die padoppervlak op sommige plekke beskadig,” het sy gesê.“Wees versigtig as jy die rivier oorsteek. As jy nie seker is nie, loop eers daardeur. As plaaslike mense nie self daardeur ry nie, moet jy ook nie. Moenie in rivierbeddings kampeer nie en moenie deur die Hoaruseb- of Hoanibrivier ry nie, hierdie riviere is bekend vir dryfsand,” het sy bygevoeg. By Ruacana het daar Saterdag 70 mm in net twee ure gereën, met die droogtegeteisterde Kamanjab wat Saterdag ook reën gehad het. Sowat 22 mm het op dié dorp self geval en tot 58 mm op die bergtoppe. Die sentrale noordelike dele van die land het ook “mooi reën” gehad, het Sakaria Gumede Kandenge op Reën in Namibia laat weet. Hy het ’n foto van ’n nat Outapi gedeel waar die water staan. In die noordooste naby Tsintsabis het dit tot 70 mm op die plaas Driemaal gereën, met nog ’n nabygeleë plaas, Kyalami, waar daar Sondagoggend 30 mm uit die reënmeter gegooi is. Op Tsumeb se lughawe en in Grootfontein het dit Saterdagnag sowat 1,5 mm gereën. Die hoofstad het ook ’n bietjie reën gehad en Michel Kunst het 5 mm Sondagoggend in sy reënmeter gehad. Intussen het die Namibiese weerkantoor vir vandag teen erge warm weer oor groot dele van die land gewaarsku, terwyl reën en geïsoleerde donderstorms in die Noorde kan voorkom. Vandeesweek bied ’n verdere kans op reënweer vir die sentrale tot noordelike dele van die land, veral vanaf Woensdag en met die fokus op die Kunenestreek. – elvira@republikein.com.na

Kunene juig, maar reën ook gevaarlik

Kommentaar

Republikein 2025-04-30

Meld asseblief aan om kommentaar te lewer

Kunene juig, maar reën ook gevaarlik

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie