Seepatrollie bring 32 ton vis in

Spoor 12 oortredings op
Beslag is op ’n Suid-Afrikaanse vaartuig tydens die eerste bilaterale, gesamentlike visserypatrollie gelê.
Leandrea Mouers

Namibië en Suid-Afrika se eerste bilaterale, gesamentlike visserypatrollie op see het 94 vaartuigwaarnemings aangeteken, 12 vermoedelike vissery-oortredings opgespoor en beslag op sowat 32 ton vis tydens ’n 25 dae lange operasie geneem. 

Amptenare sê die lesse daaruit moet na sterker handhawing en tasbare verbeterings in vissery-monitering lei. 

“Hierdie aanbevelings moet nie op papier bly nie; hulle moet deel word van ons operasionele verbeteringsprogram,” het die Namibiese kontrolebeampte, Rosalia Mupetami, gesê. Sy het gesê die lesse behoort tot beter beplanning en teikens, sterker handhawing, verbeterde vaardighede en doeltreffender monitering te lei. Die operasie van 5 tot 30 September het 2 945 seemyl oor 496 ure op see gedek. Dit het van Walvisbaai deur Namibië se suidelike eksklusiewe ekonomiese sone (EEZ) tot in Suid-Afrikaanse waters so ver as Kaappunt gestrek weer na Namibiese waters teruggekeer. Mupetami het gesê 12 vissersvaartuie is betree en geïnspekteer, vyf boetes is uitgereik, een saakdossier is geopen en beslag is op een vissersvaartuig gelê. 

Een stel nie-nakomende visgerei is gekonfiskeer, terwyl 76 buitelandse vissersvaartuie gemonitor is terwyl hulle deur die Suid-Afrikaanse EEZ gevaar het. Agt buitelandse vissersvaartuie het kennisgewings van onskuldige deurgang ingedien. 

Die syfers is verlede week tydens die afsluitingsplegtigheid van die Namibië-Suid-Afrika gesamentlike operasie vir seemonitering-, beheer- en toesigperasie op Walvisbaai bekend gemaak . 

Die patrollie is uitgevoer aan boord van Namibië se visserypatrollievaartuig, Anna Kakurukaze Mungunda, met ’n volledige Namibiese bemanning. 

Vissery-wetstoepassingsbeamptes van albei lande het saam aan boord van die vaartuig gewerk, terwyl spanne op land die operasie deur monitering en intelligensie ondersteun het. Suid-Afrika het vier beamptes aan boord van die vaartuig ontplooi en nog twee by Namibië se vissery-moniteringsentrum, waar hulle aan die insameling van intelligensie en die opsporing van vaartuie gewerk het en die intydse inligting aan personeel op see verskaf het. 

Die operasie het patrollies en die betreding van vaartuie gekombineer met vaartuigmoniteringstelsels, outomatiese identifikasiestelsels, radar-toesig, operasionele intelligensie en risiko-profilering. 

Mupetami het gesê dit het veral belangrik geword toe sterk winde, rowwe see en hoë golwe in Suid-Afrikaanse waters dit onveilig gemaak het om vaartuie te betree. Monitering het met elektronies stelsels en die insameling van intelligensie deur die spanne aan land voortgegaan . 

Een vissersvaartuig is opgespoor nadat owerhede ’n afwyking geïdentifiseer het wat verband hou met mislukkings in sy vaartuigmoniteringstelsel-oordragte. Die risiko is beoordeel en inligting is na die patrollievaartuig gestuur, wat die vaartuig opgespoor en onderskep het voordat dit na die hawe begelei is. Die vaartuig is gekonfiskeer en ’n bemiddelingskikking is daarna gesluit. Mupetami het gesê die belang van die operasie strek verder as die aantal vaartuie wat geïnspekteer is of oortredings wat opgespoor is. “Sukses moet toenemend gemeet word aan ons vermoë om nakomingsrisiko’s te identifiseer, hulpbronne doeltreffend te teiken en betekenisvolle uitkomste van wetstoepassing te bereik.” 

Sy het gesê opsporing alleen beskerm nie visseryhulpbronne nie en dat wetstoepassing tot aanspreeklikheid moet lei. Toekomstige operasies behoort daarom die koördinering tussen vissery-inspekteurs, ondersoekers, aanklaers, wetstoepassingsagentskappe, hawe-owerhede en visserybestuurders te versterk. 

Duideliker prosesse is ook nodig vir saakverwysings, bewysvereistes, beslagleggings en vervolging om te verseker dat sake doeltreffend beweeg van opsporing en ondersoek na wetstoepassing en uiteindelike vervolging, skikking of afhandeling. 

Die operasie het ook as praktiese opleiding gedien vir inspekteurs van albei lande wat ervaring opgedoen het in betredingsprosedures, ondersoeke van visgerei, verifikasie van dokumentasie, inspeksies van vangs, bewysinsameling en risiko-gebaseerde besluitneming. 

Die gesamentlike operasie het gevolg op ’n samewerkingsooreenkoms oor visserye en akwakultuur wat Namibië en Suid-Afrika op 21 Januarie 2019 onderteken het. Die operasie is beskryf as die eerste van sy soort tussen die twee lande onder die bilaterale reëling. Daar is besluit om die gesamentlike patrollie ’n jaarlikse operasie te maak, met Suid-Afrika wat na verwagting volgende jaar die leiding sal neem aan boord van sy vissery-patrollievaartuig, Sarah Baartman. Mupetami het gesê ’n omvattende verslag en aanbevelings sal nou aan die leierskap van die gesamentlike struktuur voorgelê word. 

“Die operasie is voltooi. Die lesse is vasgelê. Die werk om ons stelsel te versterk, gaan voort,” het Mupetami gesê.

– [email protected]



Kommentaar

Republikein 2026-11-20

Geen kommentaar is op hierdie artikel gelaat nie

Meld asseblief aan om kommentaar te lewer