Nog geen optrede teen Swakoppoort-stropers

Die Swakoppoortdam word al vir jare stelselmatig gestroop. Inspekteurs van die ministerie van visserye en mariene hulpbronne was op 5 Oktober vanjaar saam met Nampol en NamWater by ’n operasie betrokke waar nette uit die dam gehaal en verbrand is. Dié operasie is gereël sodat alle belanghebbendes hulle van die situasie by die dam kon vergewis en om ’n nasionale aksieplan op te stel wat by damme landswyd toegepas kan word.Volgens die ministerie se woordvoerder, me. Uaripi Katjiukua, is die ministerie bewus van die toenemende onwettige, ongerapporteerde en ongereguleerde (IUU) visvangaktiwiteite by binnelandse damme, spesifiek by Swakoppoort. “Inspekteurs het gereeld patrollies en inspeksies uitgevoer. ’n Toename in IUU visvangaktiwiteite word egter steeds waargeneem met elemente wat neerkom op georganiseerde visseryemisdaad en georganiseerde IUU visvangsindikate. "Die ministerie werk nou saam met alle belanghebbendes om aksieplanne te ontwikkel en gereelde gesamentlike operasies uit te voer om hierdie kriminele netwerke wat visreserwes onwettig uitbuit, hok te slaan. Dit sodat die hulpbronne in die damme kan herstel.”“Die dam is op NamWater se grond en onder sy bestuur.”MOEDELOOSIn Julie het verskeie boere van die groep Tugab Concerned Farmers – wat teenaan die Swakoppoortdam boer – ’n brief met hul klagtes oor die stropers aan die besturende direkteur van NamWater, mnr. Abraham Nehemia, streekraadlid van die Okahandja-kiesafdeling, mnr. Bethold Tjaveondja, en Nampol se stasiebevelvoerder op Okahandja, adj.komm. Petrus Shipepe, oorhandig. Die brief getiteld “Onwettige besetting, nie-volhoubare gebruik en diefstal by die Swakoppoortdam deur indringers” wys daarop dat dié drie kantore sedert 2018 gekontak is, met geen resultate nie.“Ons gesamentlike verliese en aanhoudende eiendomskade deur die onwettige indringers is nadelig en nie volhoubaar vir ons boerderye nie. Ons bring dit nou weer onder julle aandag en glo julle het tot dusver die situasie met handskoene hanteer, wat nadelig vir ons en die omgewing is,” lui die groep se laaste brief.“As wetsgehoorsame burgers het ons met alle middele probeer om veral met die betrokke owerhede soos NamWater in gesprek te tree, maar tevergeefs. Ook klagtes aan Nampol en die kantoor van die streekraad het dadels van gekom. Ons wil dit onder julle aandag bring dat onwettige besettings en onvolhoubare benutting van grond by Swakoppoort plaasvind. Dit brei ook uit na stropery, onwettige visvang, veediefstal en misdadigers wat daar woon (insluitend verdagtes met hangende sake teen hulle) en onvolhoubare benutting van die omgewing wat lei tot die spoedige afname en skade van biodiversiteit en omgewingskade.“Ons kan nie meer nie. Ons is raadop. Daar is nie meer ’n enkele stuks wild by die dam nie. Alles is gestroop en nou begin hulle op die plase stroop en niemand doen iets nie. Dit laat ’n mens wonder wie by die onwettige visvang en verkope baat as niemand in hoë posisies – wat die mag het om dit te stop – iets doen nie.” het een van die boere gesê. “Ons smeek vir dringende optrede in die saak voor enige ongrondwetlike optrede in die herstel van ons regte van ons beperkte hulpbronne geneem word.”NamWater het na meer as twee weke nog nie op vrae gereageer nie.tanja@republikein.com.na

Nog geen optrede teen Swakoppoort-stropers

Kommentaar

Republikein 2025-11-04

Meld asseblief aan om kommentaar te lewer

Nog geen optrede teen Swakoppoort-stropers

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.