Namibië gasheer vir Oseaanpaneel

Namibië is die eerste land in Afrika wat gasheer vir die Hoëvlakpaneel vir ’n Volhoubare Oseaan-ekonomie (Oseaanpaneel) op Walvisbaai gespeel het.Die vergadering het verteenwoordigers (Sherpas) van 19 lidlande van die Oseaanpaneel verenig, wat gesamentlik 50% van die wêreldwye kuslyne verteenwoordig, om die missie te bevorder om 100% van die seegebiede onder nasionale jurisdiksie volhoubaar te bestuur, volgens ’n verklaring wat deur die paneel uitgereik is.Die minister van visserye en mariene hulpbronne, Derek Klazen, het verlede week tydens die geleentheid beklemtoon dat oseaanbestuur nie die verantwoordelikheid van een land alleen is nie; dit vereis streek- en internasionale samewerking, ’n visie wat ooreenstem met die doelwitte van die paneel.Klazen het bygevoeg om ’n sterk en transformerende benadering tot die bestuur van die wêreld se oseane aan te neem, samewerking noodsaaklik is om onwettige, ongerapporteerde en ongereguleerde visvang, oseaanbesoedeling en verlies aan mariene biodiversiteit te takel.Klazen meen alle geleenthede moet gebruik word om die volle potensiaal van die blou ekonomie te ontsluit: “Dit sluit in beleggings in hernubare mariene energie, volhoubare akwakultuur en mariene biotegnologie, terwyl dit verseker dat hierdie aktiwiteite omgewingsverantwoordelik bly.”Verder het hy beklemtoon dat die impak van klimaatsverandering op die oseane onmiskenbaar is. “Ons moet aanpasbare strategieë soos ekostelselbestuur en gemeenskapsgedrewe inisiatiewe integreer om die veerkragtigheid van ons oseanestelsels en die mense wat daarvan afhanklik is, te verseker.”Dié vergadering kom op ’n deurslaggewende tyd wanneer die see ’n driedubbele krisis van klimaatsverandering, mariene besoedeling en oorbevissing in die gesig staar. Die Sherpa-vergaderings is ’n belangrike platform vir die bevordering van volhoubare oseaanbestuurspraktyke, -beleide en -inisiatiewe. Namibië sal aansienlik by hierdie interaksies baat en dit bied ’n uitstekende geleentheid vir indieptebesprekings en samewerking tussen leiers, kundiges en belanghebbendes.Die Oseaanpaneel staan onder die voorsitterskap van Noorweë en Palau en sluit lede van Australië, Kanada, Chili, Fidji, Frankryk, Ghana, Indonesië, Jamaika, Japan, Kenia, Mexiko, Portugal, Seychelle, die Verenigde Koninkryk, die Verenigde State van Amerika (VSA) en die Verenigde Arabiese Emirate (VAE) in.– republikein@republikein.com.na

Namibië gasheer vir Oseaanpaneel

Kommentaar

Republikein 2025-11-04

Meld asseblief aan om kommentaar te lewer

Namibië gasheer vir Oseaanpaneel

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.