Fishrot 'oorsaak van Walvisbaai, visbedryf se probleme'

Nikanor Nangolo – Mense wat na Walvisbaai gestroom het met die droom van ’n beter lewe in die visbedryf, is nou dié wat ly. Walvisbaai se burgemeester, Trevino Forbes, het tydens ’n openbare vergadering deur die Instituut vir Openbare Betrekkinge (IPPR) op die hawedorp gesê hy kan die impak van die Fishrot-korrupsieskandaal op die dorp en die plaaslike gemeenskap sien.“Dit was ’n plek waarnatoe mense van oraloor die land gekom het met die vooruitsig op ’n beter lewe. Mense kom nie meer Walvisbaai toe vir vooruitgang nie, maar om swaar te kry. Dit is die realiteit van die Fishrot-skandaal. Dit kan nooit ongedaan gemaak word nie. Ons moet voldoende en gepaste stappe doen om dit reg te stel,” het Forbes gesê.Hy is van mening wanneer jy ’n kwota aan ’n maatskappy of vaartuie toeken wat mense in die bedryf in diens neem, “doen jy die regte ding”.“Wanneer jy ’n kwota aan ’n individu om welke rede ook al gee, doen jy dit ten koste van demokrasie. Die hulpbronne van hierdie land behoort aan die meerderheid inwoners en dit kan nie in die hande van ’n enkele persoon geplaas word nie,” het Forbes beklemtoon. Hy wou ook weet of die regering in die belange van sy “eie mense” opgetree het. “Niks het verander nie. Gaan ons steeds voort op dieselfde paadjie? Julle sit almal vandag hier, omdat julle weet niks het verander nie. Ek loof die IPPR vir wat hulle probeer doen. Dit is ’n edele gebaar omdat ek die lyding van die mense in Walvisbaai elke dag sien. Fishrot is die wortel van die meeste van die probleme in ons land, ons dorp en ons visbedryf,” het Forbes gesê.“Die raad gaan voort om deur julle pyn en lyding by julle, en veral ons vissermanne, te staan. Ons probeer ons deel doen – as ’n regering – om verligting te bring,” het hy bygevoeg. Die raadslid vir die dorp se landelike kiesafdeling, Florian Donatus, het op sy beurt gesê die regering het geen programme in plek gestel om diegene te help wat deur die Fishrot-skandaal geraak is nie. “Ek is baie skaam om voor mense te staan by ’n geleentheid wat deur die IPPR gereël is. Dit terwyl ons veronderstel was om die eerste te wees met ’n geleentheid wat deur die ministerie van visserye of die kantoor van die president gereël is. Verskillende mense in die dorp wat swaar kry as gevolg van Fishrot, kom huil in my kantoor vir hulp omdat hulle niks het om te eet nie. Dit maak my hartseer om te weet daar is niks wat ek vir hierdie mense kan doen nie,” het hy gesê.“Die regering praat nie meer om oplossings te vind nie. Solank as wat die wet onveranderd bly wat een ministerie (van visserye) toelaat om kwotas toe te ken, gaan Fishrot toegelaat word om verder uit te brei,” het Donatus gesê. Hy het ook gevra of die skandaal die nodige aandag ontvang en of die regering bloot net daaroor praat. “Hoekom is die regering nie besig om met die mense op die grond te praat en uit te vind hoekom inwoners swaarkry nie, hoekom daar nie werksgeleenthede is nie en waarom hul kinders nie meer skoolgaan nie? Solank ons nie probeer om die probleem op te los nie, gaan meer mense swaarkry.” – republikein@republikein.com.na

Fishrot 'oorsaak van Walvisbaai, visbedryf se probleme'

Kommentaar

Republikein 2026-03-12

Meld asseblief aan om kommentaar te lewer

Fishrot 'oorsaak van Walvisbaai, visbedryf se probleme'

Kommentaar

Republikein 2026-03-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.