‘Vernuwe spoorweë’

Augetto GraigNamibiërs het die volle reg om ontevrede en teleurgesteld te wees met die gebrek aan treindienste vir passasiers in die land.Die minister van werke en vervoer, mnr. John Mutorwa, sê Namibiërs het “’n regmatige verwagting” op openbare spoorvervoerdienste aangesien hulle belasting betaal en gehelp het om ’n spoornetwerk te vestig.“Daar is dus groot ontevredenheid met hierdie dienste. Spoordienste vir passasiers is oor die jare verminder of is opgeskort, wat sekere groepe in die samelewing dwing om op ander, soms baie duurder, vervoer staat te maak.Die minister het uit Namibië se nuutste vervoerbeleid aangehaal gedurende sy sleutelrede by die opening van ’n slypskool om spoorweë in die land te hersien, en gesê: “’n Nuwe spoorwegstelsel is in Namibië nodig.”Spoorweg- en vervoerdeskundiges en -belanghebbendes was gister by TransNamib se hoofkantoor byeen om hieroor te besin.Buiten amptenare van die vervoerministerie, werknemers van TransNamib, die Walvisbaai-korridorgroep (WBCG), die Paaieowerheid (RA) en spoorlynkontrakteurs soos D&M Rail, het konsultante van CPCS in Kanada ook die slypskool bygewoon.Laasgenoemde is aangestel om spoorvervoer in Namibië te ondersoek en aanbevelings oor hervormings te maak. CPCS werk al meer as ’n jaar aan navorsing in dié verband.TransNamib se uitvoerende hoof, mnr. Johny Smith, het die slypskool as uiters belangrik beskryf omdat min spooruitbreiding gedoen is in vergelyking met beleggings om die paaienetwerk, hawens en ander vervoerinfrastruktuur uit te brei.Die regering is wel besig om die spoorlyn tussen Walvisbaai en Kransberg op te gradeer, terwyl D&M Rail nog 20 km se verbeteringswerk aan die spoorlyn tussen Kransberg en Tsumeb moet doen.Die adjunk- uitvoerende direkteur van vervoer, mnr. Jonas Sheelongo, het gesê Namibië moet nog baie doen in terme van wetgewing en regulasies met betrekking tot spoorvervoer. “Ons is agter, veral wat betref spoorvervoer se rol in Namibië ten einde ’n logistieke middelpunt vir die streek te word,” sê hy.Markontleding en studies oor die uitvoerbaarheid van ’n Trans-Zambezi-spoorlyn en ’n pendelaarsdiens tussen Rehoboth, Windhoek en die Internasionale Lughawe Hosea Kutako moet ook nog voltooi word, het hy gesê.Wetgewing met betrekking tot spoorvervoer in Namibië is volgens hom ook verouderd.Mutorwa sê die werk wat gedoen is om die hawe by Walvisbaai uit te brei is nutteloos as die spoordienste nie verbeter word nie.Namibië beskik oor goeie paaie, maar vrag moet met spoorwaens vervoer word eerder as met vragmotors, het hy gesê.“Dit is duidelik ons moet ons spoor- en multimodel-infrastruktuur verbeter,” sê die minister.CPCS se kenners, mnre. Andrew Boufford en George Kaulbeck, het hul navorsing en aanbevelings met deelnemers aan die slypskool gedeel.Die Kanadese stel voor die voorsiening van spoordienste en die onderhoud op die netwerk moet duidelik geskei word.Daardeur kan TransNamib, of dalk privaat diensverskaffers, in voorsiening spesialiseer terwyl die regering vir die onderhoud van spoorlyne moet sorg, het Boufford verduidelik.Verder stel hulle voor dat ’n onafhanklike reguleerder gevestig moet word. “Tans is TransNamib beide speler en skeidsregter omdat hy self-reguleer wat veiligheid betref,” sê hy.Verder moet veiligheidstandaarde deel van wetgewing word, met vereistes in verband met ontwerp- en onderhoudstandaarde en operateursregulasies.Boufford sê die regering moet ’n fonds vir spoorontwikkeling skep en ’n segment van TransNamib privatiseer, of meervoudige mededingers vir dienste wat TransNamib op die oomblik monopoliseer, moet oorweeg word.– augetto@republikein.com.na

‘Vernuwe spoorweë’

Kommentaar

Republikein 2025-12-25

Meld asseblief aan om kommentaar te lewer

‘Vernuwe spoorweë’

Kommentaar

Republikein 2025-12-25

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.