Uitvoerbaarheidstudie vir Namibia Air voltooi

Die uitvoerbaarheidstudie van N$20 miljoen vir Namibië se voorgestelde nasionale lugredery is voltooi en word tans hersien. 

Volgens die minister van werke en vervoer, Veikko Nekundi, gaan die hersiening voort selfs al bly sleutelbesonderhede onbekend te midde van voortgesette ondersoeke na deursigtigheid, koste en bestuur.

Nekundi het verlede week in die parlement gesê dat die proses onder ’n gestruktureerde interministeriële raamwerk vorder. 

Volgens die minister kan sensitiewe inligting weens die strategiese aard van die lugvaartbedryf nog nie openbaar gemaak word nie. 

“As leiers van hierdie land, net soos ander lande oraloor die wêreld, moet ons weet wat om te publiseer en wanneer om te publiseer,” het Nekundi gesê.

Hy het bevestig dat die regering sowat N$20 miljoen vir die uitvoerbaarheidstudie begroot het, waarvan minder as 4% bestee is. 

Die studie is volgens Nekundi tydens die huidige boekjaar deur ’n interministeriële span kundiges uitgevoer en word nou hersien. Hy wou egter nie die betrokke konsultante, vergelykende ontledings met vorige nasionale lugrederyverslae of gedetailleerde bevindinge bekend maak nie. 

Dit is omdat lugvaart ’n hoogs mededingende en sensitiewe bedryf is, volgens Nekundi.

“In hierdie stadium kan ons ongelukkig nie veel bekend maak nie. Ek kan egter bevestig dat die uitvoerbaarheidstudie gedoen is en nou hersien word,” het hy gesê.

Nekundi het ook die druk van die parlement van die hand gewys en die parlementslid Nelson Kalangula aangeraai om op vorige lugrederyrekords te fokus eerder as huidige prosesse. 

“Laat die agbare lid besig bly met Air Namibia-verslae, ons beweeg vorentoe met die uitvoerbaarheidstudie van Namibia Air en die gevolglike vestiging daarvan,” het Nekundi gesê.

Die voorgestelde projek, algemeen bekend as Namibia Air, word geposisioneer as ’n opvolger van die vorige nasionale lugredery Air Namibia, wat in 2020 in duie gestort het en later gelikwideer is.

In ’n aparte inligtingsessie waaroor vroeër berig is, het Nekundi bevestig dat die beplande lugredery die aanstelling van gekwalifiseerde voormalige werknemers van Air Namibia sal prioritiseer, maar slegs op ’n merietebasis.

“Ons sal voormalige werknemers van Air Namibia oorweeg, maar aanstellings sal op meriete gebaseer wees om te verseker dat die beste persoon vir elke rol gekies word,” het hy toe gesê.

Nekundi het beklemtoon dat die proses nie neerkom op outomatiese herindiensneming van voormalige personeel nie, maar eerder mededingende keuring in ooreenstemming met internasionale lugvaartstandaarde.

“Ons kan nie net iemand in diens neem bloot om hom in diens te neem nie. Kandidate moet in terme van vaardighede, etiek en kwalifikasies by die rol pas,” het hy gesê.

Die minister het verder beklemtoon dat aanspreeklikheid kern tot die nuwe struktuur sal wees en gewaarsku dat alle personeel – van direksievlak tot bedryfspersoneel – ten volle verantwoordelik gehou sal word vir prestasie en besluite.

Air Namibia se vlerke is in Maart 2020 geknip. In Februarie 2021 is dit onder voorlopige likwidasie geplaas ná hofverrigtinge wat deur krediteure, insluitend die Namibiese Lughawensmaatskappy (NAC), aanhangig gemaak is.

Meer as 600 werknemers het hul werk in die proses verloor, met skeidingsbetalings en breër sosioëkonomiese gevolge wat jare later steeds die openbare aandag trek. 

– [email protected]