Taxitariewe styg ook

Pendelaars sal landswyd 15% meer vir taxi- en bustariewe vanaf 18 Mei moet opdok tesame met brandstofpryse wat oornag gestyg het.  

Pas ná die bekendmaking van die styging van pomppryse gister, het die minister van werke en vervoer, Veikko Nekundi, aangekondig dat taxitariewe van N$13 tot N$15 sal verhoog. 

Dit is na aanleiding van ’n versoek deur die Namibië Openbare Passasiersvervoervereniging (NPPTA) en aanbevelings deur die Padvervoerraad van Namibië.

Nekundi het gesê die aanpassing is goedgekeur nadat die heersende ekonomiese omstandighede, die behoefte om vervoeroperateurs te ondersteun en die belangrikheid daarvan om die belange van pendelaars, passasiers en diensverskaffers te balanseer, in ag geneem is. 

Dit volg pas nadat die minister van myne, energie en nywerheidsontwikkeling, Modestus Amutse, gister die styging by pomppryse aangekondig het. 

Petrol 95 kos nou N$23,48 per liter by die kus, ná ’n verhoging van N$1,42, per liter terwyl vir diesel 50 ppm N$28,26 per liter en diesel 10 ppm N$28,36 per liter sakke sal ruk met ’n styging van N$4,63 per liter.

Ná die goedgekeurde aanpassings aan brandstofpryse sal die regering ’n totale geraamde bedrag van ongeveer N$1,3 miljard absorbeer, betaalbaar aan verskaffers van petroleumprodukte vir die maande April en Mei 2026 deur die Nasionale Energiefonds (NEF) se brandstofprysgelykmakingsheffing. 

Amutse het gesê die regering sal voortgaan met die tydelike vermindering en opskorting van sekere heffings, benewens ’n brandstofpadsubsidie van N$13 miljoen per maand om die vervoer van brandstof na landelike gebiede en verafgeleë bestemmings te subsidieer. 

VOLDOENDE VOORRAAD

Die land het voldoende brandstofvoorraad vir die volgende drie maande, met tans geen risiko vir voorsiening nie.

“Die ministerie wil die nasie gerusstel dat Namibië tans voldoende brandstofvoorrade handhaaf en dat daar geen onmiddellike risiko’s van tekorte in die land is nie,” het Amutse gesê. 

“Die brandstofvoorsieningsketting bly operasioneel en stabiel, met voldoende voorraadvlakke wat deur oliebemarkingsmaatskappye gehandhaaf word om aan nasionale vraag te voldoen

“Namibië voer al sy verfynde petroleumprodukte in en bly daarom aan internasionale wisselvalligheid in die oliemark en ontwrigtings in die wêreldwye voorsieningsketting blootgestel,” het hy bygevoeg. 

Amutse het gesê die aanpassing van brandstofpryse is genoodsaak deur ’n kombinasie van internasionale markontwikkelings en stygende brandstofinvoerkoste, insluitend voortgesette geopolitieke spanning in die Midde-Ooste wat wêreldwye oliemarkte beïnvloed, stygende internasionale ruolie- en verfynde petroleumprodukpryse, verhoogde vrag- en verskepingskoste vanaf internasionale markte na die hawe van Walvisbaai, hoër versekerings- en brandstofverkrygingspremies wat deur verskaffers gehef word en skommelings in wisselkoerse tussen die Namibiese dollar en die Amerikaanse dollar, wat gelei het tot aansienlik hoër onderverhalings wat in die binnelandse brandstofprysmeganisme aangeteken is. 

POMPPRYSE VERGELYK

’n Vergelykende ontleding van pomppryse het getoon dat Namibië, vanaf Mei 2026, die mees bekostigbare onder die lidlande van die gemeenskaplike monetêre gebied (GMA) bly. 

Volgens die vergelykingstabel staan Namibië se petrolprys op N$23,38 per liter en diesel teen N$29,53 per liter in vergelyking met Botswana se petrolprys teen N$24,63 per liter en diesel teen N$30,85 per liter. Suid-Afrikaners hoes N$26,63 per liter vir petrol en N$31,17 per liter vir diesel, Zambië se petrolprys is N$24,07 per liter en diesel N$30,14 per liter. Zimbabwe betaal die hoogste pomppryse met die petrolprys teen N$34,73 per liter en diesel teen N$34,89 per liter. Lesotho se petrolprys staan op N$25,90 per liter en diesel op N$34,75 per liter, terwyl Eswatini N$25,27 per liter vir petrol en N$31,60 per liter vir diesel aangeteken het. 

– [email protected]