Planne ingestel vir SA staking

Namibiërs wat sake in Suid-Afrika doen, is gewaarsku om die dreigement van dié land se derde grootste politieke party, die Economic Freedom Fighters (EFF), ernstig op te neem wat beplan om Maandag in ’n landwye staking die buurland tot stilstand te bring. Volgens die Namibian Revolutionary Transport Union (Naretu) se bevelvoerder, Petersen Kambinda, het die vakbond al sy lede gemaan om vir hul eie veiligheid nie Maandag sake in die buurland te doen nie. “Van Naretu se kant neem ons nie Julius Malema se dreigement ligtelik op nie, omdat dit gevaar vir die veiligheid van ons lede inhou,” het Kambinda gesê.“Die veiligheid van ons mense is ons belangrikste prioriteit. Daar is geen manier dat ons ons mense sal aanmoedig om tydens die staking op die pad te wees nie. “Ons het probeer om die maatskappye te betrek om seker te maak hul mense is teen Sondag uit Suid-Afrika en vir dié wat agterbly, om op ’n veilige plek te wees.”Die EFF en sy leier Malema organiseer ’n landwye staking en optogte Maandag uit protes teen die voortgesette toepassing van beurtkrag en eis die bedanking van die Suid-Afrikaanse staatshoof, Cyril Ramaphosa.Vervoermaatskappye wat deur Republikein se susterskoerant Namibian Sun gekontak is, sê hulle is bewus van die bedreiging wat die staking vir die veiligheid van drywers en vragmotors inhou. Veiligheidsmaatreëls is wel ingestel om te verseker hulle word nie geraak nie. Sakkie Snyman van Snyman Transport sê hulle het reeds in gesprek getree met hul eweknieë in Suid-Afrika, sowel as om seker te maak hul drywers is veilig wanneer die land Maandag tot stilstand gebring word.“Die veiligheid van ons drywers is ons grootste kommer. Ons is op ’n aantal WhatsApp-groepe en sal in gesprek wees met ons eweknieë in die land en ons drywers oor watter roetes veilig is om te gebruik,” het Snyman gesê.“Ons is in voortdurende kontak met ons drywers en maak seker hulle is veilig. Jy kan ’n nuwe lorrie koop as dit beskadig word, maar jy kan nie ’n lewe vervang nie. Ons sal vanaf Sondag vir ons drywers sê waar om te stop en waar om te ry, omdat ons afhanklik is van inligting van ons vriende in die vervoerbedryf in Suid-Afrika.” FlyNamibia se Elzanne McCulloch sê die redery word nie deur die beplande staking in Suid-Afrika geraak nie.“FlyNamibia het nog geen kansellasies of navrae van passasiers hieroor ontvang nie. Ons is ’n verskaffer van ’n vervoerdiens en is ten alle tye verbind tot die veiligheid en sekuriteit van ons passasiers aan boord van ons vliegtuie. “Ons het volle vertroue in die vermoë van verwante owerhede by die lughawens wat ons gebruik, wat insluit Kaapstad Internasionaal, om die risiko te bestuur en openbare veiligheid te verseker,” het McCulloch gesê. – republikein@republikein.com.na

Planne ingestel vir SA staking

Kommentaar

Republikein 2026-05-05

Meld asseblief aan om kommentaar te lewer

Planne ingestel vir SA staking

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.