Nujoma se Lear-straler ‘niks werd’

Francoise Steynberg en Tuyeimo HaufikuAs die vliegtuig vlieg, sal hy nie lank vlieg nie, want die Lear-stralers is niks meer werd nie en daar is nie meer onderdele beskikbaar nie.Dit is die mening van ’n kenner in die lugvaartbedryf in reaksie op die oorweging om die Lear-straler wat die regering tydens stigterspresident Sam Nujoma se administrasie aangeskaf is, in ’n lugambulans te omskep.Republikein het verneem die vliegtuig, wat al voorheen vir mediese noodvlugte gebruik is, moontlik op 4 November amptelik deur president Netumbo Nandi-Ndaitwah aan die ministerie van gesondheid en maatskaplike dienste oorhandig kan word, met die doel om die vervoer van noodpasiënte oraloor Namibië te verbeter. Die presidensie sê egter besprekings oor die vliegtuig is steeds in die beplanningsfase en geen finale besluit is goedgekeur nie. ‘GEEN ONDERDELE’Die kenner in lugvaartbedryf is skepties oor die planne. “Hierdie straler en NamPower s’n is werklik niks meer werd nie. Daar is nie meer ’n fabriek wat onderdele vervaardig nie, jy kry nie meer onderdele nie,” het hy gister aan Republikein gesê. “Niemand in Amerika wil ook die vliegtuig terugkoop nie,” waar die luukse stralers in Wichita in die deelstaat Kansas vervaardig is.Die bron sê: “Hierdie oefening het ons al tien jaar gelede probeer om werk vir die vlieëniers te soek sodat hulle meer kan vlieg. “Die vliegtuig het bitter lanklaas gevlieg. As hulle die vliegtuig in die lug kry, sal hy nie lank vlieg nie. Die kans dat hulle hom in die lug gaan kry en hou, is bitter skraal.” Volgens die bron is vlieëniers wat die Lear-straler vlieg, veronderstel om ten minste een keer ’n jaar vir simulasie-opleiding van die vliegtuig in Amerika te gaan. LUGAMBULANSDie voorgestelde reëling volg op ’n erkenning deur die gesondheidsminister, dr. Esperance Luvindao, dat pasiënte gesterf het terwyl hulle tussen gesondheidsgeriewe oorgeplaas is, wat die regering aangespoor het om die vestiging van ’n toegewyde nasionale lugambulansdiens te ondersoek. Die ministerie het nie bevestig of die Lear-straler formeel aan hom toegewys is nie, of hoeveel dit sou kos om die vliegtuig vir mediese gebruik op te knap. Bronne wat met die besprekings vertroud is, sê voorbereidings is aan die gang om die vliegtuig na die gesondheidsministerie oor te dra, met ’n simulasie-oefening wat ook beplan word. Mateus Kaholongo, uitvoerende direkteur in die presidensie, het egter gewaarsku dat die voorstel nog nie amptelike goedkeuring ontvang het nie. “Die hele ding is in die beplanningsfase. Dit word nog geformaliseer. Dit is nie aanvaar en goedgekeur nie,” het hy gesê. Die minister van werke en vervoer, Veikko Nekundi, het nie onmiddellik gereageer op vrae wat aan hom gestuur is nie, terwyl die ministerie se uitvoerende direkteur, Jonas Sheelongo, navrae na Kaholongo verwys het. ’n Bron na aan die saak het gesê die gesondheidsministerie beplan om binnekort ’n simulasie met die vliegtuig te doen, hoewel geen datum gegee is nie. Die vliegtuig kan glo ook mediese uitreikprogramme in afgeleë gebiede en streke wat deur natuurrampe geraak word, ondersteun. “Die voorgestelde Lear-straler gaan nie net oor pasiënte se behoeftes nie, maar ook oor uitreikprogramme in die Noorde, soos wanneer vloede heers,” het ’n bron gesê. Nog ’n bron met mediese kennis het gesê Lear-stralers is geskik vir mediese ontruiming en kan die ministerie se vermoë versterk om noodpasiëntsorg te lewer. Nahas Angula, voorsitter van die Sam Nujoma-stigting, het die moontlikheid verwelkom om die vliegtuig te gebruik om toegang tot mediese dienste te verbeter, veral vir mense wat ver van groot hospitale woon. “As dit waar is, is dit ’n goeie idee. Namibië is ’n land van afstande, en dit sal wonderlik wees as mense vinniger mediese dienste kan kry, soos dié diep in Katima,” het hy gesê. GESKIEDENISDie Lear-straler se geskiedenis dateer terug na 1994, toe die regering die vliegtuig tydens Nujoma se presidentskap aangeskaf het. Die aankoop het openbare ondersoek ontlok oor regeringsbesteding, met berigte destyds wat aangedui het dat die Lear-straler 31A meer as N$10 miljoen gekos het. Die verkryging is vroeg in 1995 erken deur die destydse eerste minister, Hage Geingob, wat later Namibië se derde president geword het. Meer as drie dekades ná die aankoop word die vliegtuig nou vir ’n mediese rol oorweeg, hoewel die voorgestelde oordrag, opknappingskoste en bedryfsreëlings steeds aan amptelike goedkeuring onderhewig is.Volgens Republikein se argief, is die straler op 27 September 2006 vir die tweede keer binne 24 uur ingespan om ’n noodvlug na Suid-Afrika te onderneem met ’n pasiënt wat dringend mediese behandeling moes ondergaan.– francoise@nmh.com.na– tuyeimo@nmh-hub.com.na

Nujoma se Lear-straler ‘niks werd’

Kommentaar

Republikein 2026-10-15

Meld asseblief aan om kommentaar te lewer

Nujoma se Lear-straler ‘niks werd’

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.