Napta: Staatsubsidies vir taxi’s kan pendelaars beskerm

Die Namibië Bus- en Taxivereniging (Napta) het ’n beroep op die regering gedoen om taxitariewe te subsidieer.

Napta se sekretaris-generaal, Pendapala Nakathingo, het gesê die onlangse taxitariefverhoging van N$13 na N$15 was nodig, maar steeds onvoldoende gegewe die skerp kostestyging van brandstof, voertuiginstandhouding en ander kommoditeite.

“Ons doen ’n beroep op die regering om te oorweeg om die taxibedryf te subsidieer,” het Nakathingo onlangs op NTV se Evening Review-program gesê.

Hy het voorgestel dat pendelaars N$8 betaal en die regering N$7 “of wat hulle ookal kan bekostig”.

Nakathingo het gesê sowat 65% van Namibiërs maak staat op openbare vervoer.

Hy het aangevoer dat die subsidiëring van openbare vervoer nie net operateurs sou help nie, maar ook pendelaars sou beskerm wat daagliks van taxi’s afhanklik is vir ritte na werk, winkels, skool en kerk.

“Ons moet saamwerk en hierdie pyn saam voel,” het hy gesê.

NOG VERHOGINGS OP DIE HORISON

Nakathingo het gewaarsku as internasionale onstabiliteit voortduur en brandstofpryse aanhou styg, verdere taxitariefverhogings onvermydelik kan word.

“As ons sien dit is nodig, dan sal dit volgens die situasie bepaal word,” het hy gesê.

Hy het egter beklemtoon dat Napta probeer om die belange van operateurs en pendelaars te balanseer.

“Ons is redelik. Ons kyk nie net na die sakke van taxibestuurders nie. Ons neem ook die situasie van pendelaars in ag,” het hy gesê.

Nakathingo het gesê baie taxi- en busoperateurs sukkel om voertuie behoorlik in stand te hou weens stygende koste, en bygevoeg dat swak instandhouding pendelaars se veiligheid in gevaar kan stel.

“Jy hoor van ongelukke wat gebeur weens bande wat bars, remme wat weier en al daardie dinge,” het hy gesê.

HUISHOUDINGS LY

Oor die algemeen het brandstofpryse amptelik minstens vier keer tussen Maart 2025 en Mei vanjaar gestyg.

Simonis Storm Securities het vroeër vandeesmaand gewaarsku het dat stygende oliepryse wêreldwyd inflasie in die komende maande nog hoër kan opstoot.

Die firma het gewaarsku dat stygende brandstofkoste reeds na vervoer, kos en dienste oorspoel.

In Maart 2025 het die regering petrol- en dieselpryse met 50 sent per liter verhoog.

Na verskeie maande van stabiliteit het brandstofpryse in Desember 2025 weer met 21 sent per liter gestyg.

Die skerpste verhogings het egter vanjaar gekom.

In April het petrolpryse met N$2,50 per liter gestyg, terwyl diesel met N$4 per liter opgeskiet het ná toenemende spanning in die Midde-Ooste en stygende oliepryse wêreldwyd.

In Mei het petrol met nog N$1,40 per liter gestyg, terwyl diesel met nog N$4,63 per liter geklim het, wat brandstofpryse naby vlakke gestoot het wat laas tydens die wêreldwye energiekrisis van 2022 ervaar is.

– [email protected]