Namibia Air: ‘Saam met Namibiërs, vir Namibiërs’

Die Independent Patriots for Change (IPC) het kommer uitgespreek oor Namibië se samewerking met Ethiopian Airlines oor die stigting van die land se voorgestelde nuwe nasionale lugredery, Namibia Air. Die kommer spruit voort uit ’n interne memorandum laat in Augustus oor vergaderings wat tussen Namibiese amptenare en Ethiopian Airlines op 21 en 22 Augustus 2026 in Addis Abeba gehou is. Die gesprekke het op moontlike samewerking in die stigting van die lugredery gefokus.IPC se skaduminister van werke en vervoer, Nelson Kalangula, het gesê die voorgestelde vennootskap laat vrae ontstaan oor die rol van Namibiese beroepslui in lugvaart en die land se beheer oor die nuwe lugredery.Volgens ’n inligtingsverslag deur die uitvoerende direkteur van werke en vervoer, Jonas Sheelongo, het Ethiopian Airlines aangedui ’n aandelevennootskap sal bestuursbeheer vereis. In die verslag aan die vervoerminister Veikko Nekundi word dit aangedui as insluitend die uitvoerende hoof, die hoof- finansiële beampte en ook leierskap vir instandhouding. “Namibië het nie ’n tekort aan uitvoerende kapasiteit nie. Volgens die interne verslag het Ethiopian Airlines dit as ’n voorvereiste vir enige toekomstige aandele- of bestuursvennootskap gemaak dat hulle volle bestuursbeheer oorneem,” het Kalangula gesê.Ethiopian Airlines het ook voorgestel om drie ATR 72-600-vliegtuie gedurende die eerste drie jaar te bedryf, en dit later met ’n Boeing 767 op te volg. Namibië het intussen Embraer 145- en 175-vliegtuie gebaseer op die grootte van die mark voorgestel. Beide partye het ooreengekom om Embraer-vliegtuie vir binnelandse bedrywighede te evalueer. Ethiopian Airlines het verder voorgestel dat die Windhoek-Johannesburg-, Windhoek-Kaapstad- en Windhoek-Luanda-roetes van die aanvanklike netwerkroetes verwyder word. Die lugredery se aanbeveling is om met drie vliegtuie en een daaglikse vlug na Johannesburg te begin en later uit te brei om risiko’s te verminder.Volgens Sheelongo se verslag oor die gesprekke in Addis Abeba, het Namibië die belangrikheid van die drie roetes vir die sukses van sy sakeplan herhaal. Kommer is ook uitgespreek oor Ethiopian Airlines se geprojekteerde tydlyn vir sy vyfjaarplan om gelyk te breek, asook oor die geskiktheid van die voorgestelde vliegtuig vir Namibiese lughawens.Kalangula het bevraagteken waarom Namibië se haalbaarheid- en markstudie ter syde gestel sou word, sou die land uiteindelik Ethiopian Airlines se teenvoorstel aanvaar. Volgens hom het die studie N$20 miljoen gekos. Hy het ook gevra dat die volle uitgawes aan die parlement voorgelê word.Kalangula het ’n beroep op beroepslui in die Namibiese lugvaartbedryf gedoen om formeel betrokke te raak by die verfyning van die beplande lugredery se sakeplan, asook die bepaling van bestuurstrukture. Dit sluit voormalige Air Namibia-bestuurders en plaaslike tegniese kundiges in. “Namibië beskik oor ’n poel hoogs geskoolde, internasionaal gesertifiseerde lugvaartpersoneel. Baie het onskatbare ervaring met die voormalige Air Namibia, private lugvaartsektore en streeklugrederye opgedoen,” het hy gesê.Volgens die Addis Abeba-verslag het die partye ooreengekom om tegniese samewerking onder ’n moontlike bestuurskontrak te ondersoek. Ethiopian Airlines het aangebied om te help met die verfyning van die sakeplan, die totstandkoming van die lugredery, opleiding, instandhouding, sertifiseringsdokumentasie en die verkryging van vliegtuie. Die Namibiese vervoerministerie het aanbeveel dat die partye met tegniese samewerking en die bestuurskontrak voortgaan, terwyl Ethiopian Airlines deelname aan aandele oorweeg. Die ministerie het ook aanbeveel dat prioriteit aan ondersteuning met sertifisering en die verfyning van die sakeplan verleen word, ten einde die teiken te bereik om teen Desember 2026 met bedrywighede te begin.“Namibië se lugvaartbedryf moet saam met Namibiërs, vir Namibiërs, gebou word. “Strategiese vennootskappe is welkom, maar nie ten koste van ons nasionale kundigheid, plaaslike indiensneming en uitvoerende selfbeskikking nie,” het Kalangula gemaan.Hy het gevolglik ’n beroep op die ministerie gedoen om die teiken van Desember te heroorweeg, indien die nakoming van die sperdatum tot ’n bestuursooreenkoms sou lei wat Namibië se nasionale lugvaartbelange in gevaar stel. – aurelia@nmh-hub.com.na

Namibia Air: ‘Saam met Namibiërs, vir Namibiërs’

Kommentaar

Republikein 2026-09-01

Meld asseblief aan om kommentaar te lewer

Namibia Air: ‘Saam met Namibiërs, vir Namibiërs’

Kommentaar

Republikein 2026-09-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.