Namibië steun oop lugruim oor Afrika

’n Doeltreffende lugvaartnetwerk wat goed verbind is, speel ’n deurslaggewende rol om moeitelose handel moontlik te maak, nywerhede te ondersteun en markte oraloor Afrika en verder op internasionale vlak te ontsluit.

Die minister van werke en vervoer, Veikko Nekundi, het die Lugvaartweek vir Afrika Woensdag amptelik in die hoofstad amptelik geopen.

In sy openingswoord het hy gesê dat die tema “Linking Africa: Partners for Growth,” bring verteenwoordigers van regerings, burgerlugvaartowerhede, lugrederye, lughawens, reguleerders, beleggers en leiers in militêre lugvaart byeen. 

Hierdie partye kom byeen “om ’n gemeenskaplike toekoms vir ons vasteland se lugruim te bepaal,” het die minister gesê.

Hy het die buurland, Zambië, met die inisiatief van die platform gelukgewens wat vir die eerste keer in Windhoek aangebied word. 

Op die amptelike webwerf sê die stigter van die platform, Hellen Ngwira Mwamba, dat die hoofdoel van die geleentheid is om ’n geïntegreerde platform vir kennisdeling, bemagtiging en vernuwing te skep wat die vasteland se lugruim en markte oorbrug.

Namibië het saam met 38 Afrikalande by die Enkele Afrika Lugvervoermark (SAATM) aangesluit wat hulle tot ’n oop lugruim verbind het.  

“Dit is ’n politieke prestasie van werklike betekenis. Hierdie inisiatief is ’n voorbeeld van ons toewyding om ’n geïntegreerde en mededingende lugvaartbedryf oraloor Afrika te bevorder,” het Nekundi benadruk. 

“Lugverbinding is die lewensaar van Afrika se ekonomiese en maatskaplike ontwikkeling. 

“Deur reisbeperkings te verslap, tariewe te verlaag en verbinding te verbeter, sal SAATM nuwe ekonomiese geleenthede ontsluit, toerisme bevorder en handel binne Afrika en belegging vergemaklik,” het hy gesê.

Volgens Nekundi fokus Namibië se lugvaartprioriteite, soos vervat in die sesde nasionale ontwikkelingsplan (NDP6), daarop om die land as ’n logistieke spilpunt en transito-toegangspoort vir landgeslote buurlande soos Zambië, Zimbabwe en Botswana te vestig, asook vir die breër Suider-Afrikaanse Ontwikkelingsgemeenskap (SADC). 

“Ons lugvaartverbinding is nie net ’n nasionale prioriteit nie, dit is ’n verantwoordelikheid in die streek,” het hy gesê. 

Volgens Nekundi is “lugvaart ’n hoeksteen van Namibië se bydrae tot die Afrika-vryehandelsgebied (AfCFTA)”.

Die minister beklemtoon dat “’n robuuste lugvaartsektor sosioëkonomiese ontwikkeling sal versnel en sal help om die visie van ’n verenigde, voorspoedige Afrika te verwesenlik. 

“Dit is die noodsaaklike infrastruktuur wat ons in staat stel om die volle potensiaal van handel, toerisme en kultuur in Afrika te ontsluit.”

Plaaslik gee ontwikkelingsplanne voorrang aan die ontwikkeling van die Hosea Kutako Internasionale Lughawe (HKIA) met die bou van ’n derde terminaal, die herlewing van ’n nasionale lugredery en die verkryging van infrastruktuur vir die lugverkeerbeheerstelsel, insluitend primêre en sekondêre radarstelsels.

Uit die vuis het die minister ook die hoë koste van binnelandse vlugte in die land betreur. Hy het binnelandse lugrederye aangemoedig om pryse te heroorweeg, soos om N$9 000 vir ’n retoerkaartjie van Windhoek na Ondangwa te vra, wat volgens hom duurder is as om na Suid-Afrika te vlieg. 

Nekundi het gesê sulke pryse moet verlaag word, anders kan hy gedwing word om die bedryf direk te reguleer. Hy het die plaaslike lugrederybedryf ses maande gegee om sy waarskuwing ter harte te neem.

Nekundi het sy hoop uitgespreek dat nuwe handelsooreenkomste gesluit word, gesamentlike ondernemings verken word, tegniese kundigheid gedeel en regulatoriese raamwerke in pas met mekaar te bring.

– [email protected]