NAC se brandweeruniforms lê in stoor

Die Namibië Lughawensmaatskappy (NAC) sit steeds met brandbestrydingsuniforms ter waarde van N$692 300 wat as nie geskik vir die doel geag is nie – tien jaar nadat dit aangekoop is.

Die uniforms, waarvan sommige na bewering by Eros-lughawe in die hoofstad gestoor word, is uitgewys in ’n ondersoek deur die ministerie van werke en vervoer na bestuur, verkryging en operasionele aangeleenthede by die lughawe-operateur in staatsbesit.

Die ministerie se hoof- interne ouditeur, Lineekela Joseph, het in Mei interne ouditondersoeke gedoen wat bestuur-, verkrygings- en onreëlmatighede by die maatskappy blootgelê het.

Onder die bevindinge het ondersoekers die aankoop as ’n vermorsing in verkryging uitgewys.

“Gedurende die ampstermyn van Tamer El-Kallawi (as uitvoerende hoof), het die Namibië Lughawensmaatskappy brandbestrydingstoerusting en uniforms (PBT) teen ’n koste van N$692 300 aangekoop wat nie aan die standaard voldoen het nie (nie geskik vir die doel nie). Sommige van die uniforms is tot op hede nog by Eros-lughawe se stoor,” lui die verslag.

Die bevindinge laat vrae ontstaan oor hoe die beskermende toerusting verkry is, waarom dit as ongeskik vir operasionele gebruik bevind is en of die verskaffer aan die vereiste spesifikasies voldoen het.

In reaksie op die ministerie se bevinding het NAC verduidelik dat dit die uniforms sal opveil.

“Die saak is behoorlik genoteer en die kwessie sal opgelos word ooreenkomstig toepaslike beleid en regsraamwerk (items sal opgeveil word),” lui die lughawensmaatskappy se reaksie.

NAC-woordvoerder, Dan Kamati, het Dinsdag aan Republikein gesê die maatskappy is bewus van die saak.

“Die besending is omstreeks 2014-’15 verkry en deur die destyds verantwoordelikes afgeteken en in geouditeerde jaarverslae ingesluit,” het Kamati gesê.

Hy het bygevoeg dat Bisey /Uirab in 2019 by NAC aangesluit het en dus nie in staat was om oor ’n saak te praat wat voor sy ampstermyn as die huidige uitvoerende hoof plaasgevind het nie.

– [email protected]