Forum plaas kollig op lugvaartbedryf

Die Namibië Lughawensmaatskappy (NAC) hou tot vandag ’n forum – die eerste van sy soort – by die Safari Hotel in die hoofstad om die lugvaartbedryf te bespreek. Die minister van werke en vervoer, mnr. John Mutorwa, het gister die geleentheid amptelik geopen. Kenners en rolspelers in die bedryf, vanaf Namibië, Suid-Afrika, die res van die vasteland en van Europa kom byeen om die hernuwing van lugvaart onder die loep te neem. Die Finse minister van ontwikkeling, samewerking en buitelandse handel, mnr. Ville Skinnari, het in sy toespraak die vestiging van ŉ sentrum van uitnemendheid in siviele lugvaart in Namibië, deur ’n vennootskap tussen Finland en Namibië, aangekondig.Buite die Safari Hotel het oudwerknemers van die voormalige nasionale lugredery, Air Namibia, met plakkate gestaan en stilweg betoog. Air Namibia is verlede jaar gelikwideer en talle werknemers wag nog op die volledige uitbetaling van hul skeidingspakkette. Dr. Leake Hangala, voorsitter van die NAC-raad, het gesê Namibiërs is toegewy tot gesprekvoering, en dat dit broodnodig in die lugvaartbedryf is. “Die antwoorde lê nie net binne ons grense nie, maar in die streek en verder weg.” Hy sê Namibië is oop vir die wêreld en lugvaart is ’n noodsaaklike skakel en die NAC het ’n verantwoordelikheid om dit te ontwikkel. “Baie Namibiërs het nog nooit gevlieg nie. Ons moet dit meer toeganklik vir hulle maak,” sê hy. Gister het onder meer verteenwoordigers van Airbus en die Internasionale Lugvervoervereniging (Iata) in Suider-Afrika voorleggings gemaak. Gesprekke rakende die rol van professionele mense in lugvaart en die toekoms van Afrika-lugrederye is gehou. Die ontwikkeling van plaaslike tegniese dienste en die gebruik van roetes om die bedryf te laat groei, is ook onder die vergrootglas geplaas. Die kwessie van kwesbare nasionale lugrederye is gister namiddag bespreek voor die galadinee gisteraand by Droombos gehou is. Vandag se program sluit onder meer gesprekke oor die ontwikkeling van infrastruktuur in, die herstel van lugvaart ná Covid-19, en die uitbreiding van lugvragvervoer. Die finansiering vir die ontwikkeling van die lugvaartbedryf en die regulering van siviele lugvaart word ook vandag bespreek. Hangala sal na verwagting om 13:000 die program afsluit. – augetto@republikein.com.na

Forum plaas kollig op lugvaartbedryf

Kommentaar

Republikein 2025-11-05

Meld asseblief aan om kommentaar te lewer

Forum plaas kollig op lugvaartbedryf

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.