Fly Etosha op die horison

’n Afgetrede vlieënier, kaptein William Ekandjo, wil sy kennis en ervaring na dekades by die verlore nasionale lugredery Air Namibia terugploeg. Om dié rede stig hy Fly Etosha Airways. Die nuwe lugredery se aansoek om lugvervoerdienste te lewer, is op 23 Januarie in die Staatskoerant gepubliseer. Teenstanders het tot komende Dinsdag tyd om hul besware by die sekretaris van die Vervoerkommissie van Namibië in te dien. Ekandjo hoop daar sal geen besware wees nie, maar erken so ’n proses mag tot ’n vertraging van die uiteindelike amptelike bekendstelling van die nuwe lugredery bydra.Die nuwe lugredery moet verder ook nog aansoek doen om ’n lugoperateursertifikaat (AOC) wat deur die Namibië Burgerlugvaartowerheid (NCAA) uitgereik word. Volgens NCAA se uitvoerende direkteur, Toska Sem, sal ’n AOC-aansoeker ’n streng vyf-fase sertifiseringsproses moet deurkom om te verseker dit voldoen aan die toepaslike regulasies. Dié proses sal ook eers ná die goedkeuring vanaf die Vervoerkommissie begin, brei sy uit.Die aansoek aan die kommissie sit uiteen dat Fly Etosha beplan om binnelandse, streek- en internasionale vlugte te onderneem. Die nuwe lugredery wil Windhoek, Ondangwa, Katima Mulilo, Walvisbaai, Lüderitz, Rundu en Oranjemund bedien, saam met vlugte na onder meer Victoria Falls, Johannesburg en Kaapstad. Fly Etosha sal vanuit die Internasionale Lughawe Hosea Kutako en die Eros lughawe baseer wees. Passasiers sal besigheids- of ekonomieklas kan vlieg terwyl bagasie, vragladings en gevaarlike goedere ook vervoer sal kan word. Die nuwe lugredery besit reeds, volgens hul aansoek, drie Cessna Grand Caravans, drie Beech 1900’s, drie King Air 350’s, ’n ATR 42, ’n Dash 8 en ’n F-50. Daar word beoog om nog 12 vliegtuie te huur en later nog 21 vliegtuie aan te koop, word in die Staatskoerant berig. “Mense se behoefte om te vlieg en die tekort aan geleenthede vir Namibiërs dryf my,” sê Ekandjo. “Dis gans te stil in Namibië se lugruim. Daar is nie lugvervoer nie. Ons moet ons land ontwikkel en sonder ordentlike lugvaartstrukture sal ons nie ontwikkel nie.”Danksy sy jarelange ervaring by Air Namibia, insluitend op bestuursvlak, weet hy wat hy doen. “Ons wil doen wat Air Namibia nie kon doen nie. As daar maar regte beheer was, sou dinge anders uitgewerk het, maar die regering kon nie die regte mense in die regte posisies plaas nie. Die potensiaal was daar, maar dit was nie reg bestuur nie. Ons sal dit in die hande van die regte mense los,” sê hy.Fly Etosha is reeds gereed in terme van kajuitpersoneel en ander vaardighede, sê Ekandjo. “Air Namibia se werknemers sit op straat en kry swaar. Ons is almal honger vir hierdie geleentheid.”Hy glo die naam Fly Etosha hou internasionaal ’n sterk konnotasie met Namibië in en is ook vir Namibiërs van groot betekenis. Hy glo Namibiërs sal die nuwe lugredery ondersteun omdat dit ’n lugredery vir almal sal wees. Fly Etosha sal die land weer in die lug verteenwoordig “noudat Air Namibia nie meer daar is nie”.Hy sê die begin van Fly Etosha vlugte sal afskop sodra die vereiste prosedure afgehandel is. Die wagtyd tot dan sal net afhang van die spoed waarmee aan elke regulasie voldoen kan word.– augetto@republikein.com.na

Fly Etosha op die horison

Kommentaar

Republikein 2026-03-20

Meld asseblief aan om kommentaar te lewer

Fly Etosha op die horison

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.