Doen jou deel vir padveiligheid

Die jaarlikse padveiligheidsveldtog vir die feesseisoen skop amptelik eerskomende Vrydag op Swakopmund af. Die uitvoerende hoof van die Motorongelukkefonds (MVAF), Rosalia Martins-Hausiku, het Maandag die geldinsamelingsontbyt vir belanghebbendes geopen. Sy sê almal het ’n verantwoordelikheid om ambassadeurs vir ’n verandering op Namibiese paaie te wees, en padongelukke en verwante beserings en sterftes teen te werk.Met die publiek se samewerking was daar verlede jaar oor die betrokke tydperk ’n afname van 14,4% in ongelukke en 17,5% minder beserings asook ’n daling van 42,2% in lewensverliese, het sy gesê. Volgens die uitvoerende sekretaris van die Nasionale Padveiligheidsraad (NRSC), Eugene Tendeluke, skep Namibië se toepassing van die Afrika-padveiligheidshandves sedert 2019, die geleentheid vir almal om tot die veldtog se doelwitte by te dra. “Jy is ’n speler op die veld en ons het jou volle deelname nodig,” het hy gesê. ’n Reeks geleenthede sal ná die amptelike opening van die veldtog begin, soos onder meer ’n sokkertoernooi eerskomende Saterdag waar die taxigemeenskap teen wetstoepassers sal meeding, en Sondag is Afrika-padveiligheidsdag, het hy gesê. “Die kernfokus is op die B1 en B2 aangesien ongelukke geneig is om op hierdie paaie plaas te vind. Streekbevelvoerders het egter ook operasionele opdrag ontvang,” sê hy. Die owerhede sal verder fokus op veral spoed, voetgangers en roekelose bestuur, met die klem op bestuurders, voetgangers en fietsryers tussen 16 en 35 jaar oud, voeg hy by. Padblokkades kan onder meer tussen 4 en 9 Desember in die Otjozondjupastreek verwag word, in Oshona tussen 11 en 14 Desember, in Erongo tussen 16 en 21 Desember, vanaf 8 tot 10 Januarie in die Khomasstreek, en tussen 12 en 16 Januarie weer in Otjozondjupa. Altesaam N$1,66 miljoen is by die ontbyt vir die veldtog, wat tot 17 Januarie sal duur, bewillig.Verlede jaar is N$1,1 miljoen ingesamel en die MVAF se bestuurder vir die voorkoming van ongelukke en beserings, Jones Lutombi, het belanghebbers aangemoedig om vanjaar meer te gee. Die MVAF het N$600 000 bewillig, bo en behalwe sy eie onkoste om te verseker daar is nooddienste op die toneel. Shell Namibia Upstream het N$450 000 bewillig – spesifiek vir 40 alkoholtoetstoestelle en 4 000 mondstukke. Die Padfondsadministrasie (RFA) skenk N$230 000 vir ’n nuwe draagbare ventilator vir die noodsentrum op Mariental.Namibia Breweries gee N$200 000, insluitend N$90 000 vir verversings (koeldrank), B2Gold N$40 000 en Bank Windhoek N$40 000 vir reflektiewe baadjies. MTC skenk N$50 000 vir die opknapping van die Otjozondjupa-padblokkade en N$10 000 se selfoonkrediet, terwyl NWR N$50 000 in koopbewyse bewillig.Nog bydraes word verwag en Martins-Hausiku het gesê ’n geleentheid sal gereël word om skenkers te bedank.Seremoniemeester Hilaria Graig sê die eerste beloftes is maar die punt van die ysberg en Ambrosius Tierspoor, hoof van kommunikasie by die NRSC, het ook N$500 in sy persoonlike hoedanigheid geskenk. “Eenheid maak mag,” het hy gesê in verband met padveiligheid. Hy herhaal Martins-Hausiku se standpunt dat die land ver kan kom wanneer Namibiërs saamwerk om ’n verskil te maak in terme van die bloedbad op ons land se paaie. – augetto@republikein.com.na

Doen jou deel vir padveiligheid

Kommentaar

Republikein 2025-11-04

Meld asseblief aan om kommentaar te lewer

Doen jou deel vir padveiligheid

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.