Discover Airlines: Nog ’n vlug is vertraag

Gisteroggend het nog ’n persoon gekla oor die diens van die lugredery Discover Airlines: “Lufthansa-vlug FY138 van Frankfurt na Windhoek is gisteraand gekanselleer sonder om ’n rede aan passasiers te verskaf. Sommige passasiers wat vroeg opgedaag het, is in hotelle geakkommodeer. Ander moes die nag in die gange slaap. My dogter het ’n bietjie laat uit Londen aangekom en moes die nag saam met twee vreemde mans in ’n gang deurbring, met geen ander mense of sekuriteit in sig nie. Vanoggend het sy ander passasiers teëgekom wat ook in gange moes slaap.”

Volgens die betrokke persoon het die passasiers ook besef dat die geskeduleerde vlug van die oggend weer sonder hulle vertrek het, aangesien dit “reeds vol” was. Hulle is verseker dat hulle op môre se vlug (m.a.w. op 4 Januarie) kan staatmaak.

“Talle toeriste het reeds hul beplande aansluitings met onder meer safari’s en lodges gemis as gevolg daarvan. My dogter was gelukkig genoeg om ’n sitplek te kry en sal vanaand in Namibië aankom. Sy het egter met verskeie toeriste gepraat wat kwaad is. Lufthansa het nie eens ’n kantoor in Namibië nie en hulle nommer in Suid-Afrika bly onbeantwoord,” het die persoon (naam bekend aan die redaksiespan) gekla.

Toe Namibia Media Holdings (NMH) vir Renette Scholtz, die plaaslike verteenwoordiger van Discover Airlines, vir kommentaar kontak, het sy geskryf: “Gisteraand se vlug is vertraag en is tot vanoggend uitgestel, dit is reeds op pad na WDH (Windhoek). Vir enige amptelike korrespondensie, kontak asseblief ons direkteur vir korporatiewe kommunikasie en woordvoerder, Leonie Bueb.”

Dit wil dus voorkom asof Discover Airlines die vorige neiging volg van die gelikwideerde Air Namibia, wat navrae aan derde partye aangestuur het in plaas daarvan om self op die navraag te reageer.

’n Bekende persoonlikheid uit die Namibiese toerismesektor het soos volg gereageer: “Discover/Lufthansa kanselleer of vertraag ten minste een vlug per week sedert November. Niemand weet presies hoekom nie.”

Nadat Lufthansa se filiaal Eurowings Discover die lugverkeer tussen Namibië en Duitsland herstel het redelik kort ná die finansiële ineenstorting van die staatsbeheerde Namibiese lugredery Air Namibia, het kliënte sowel as Eurowings aanvanklik hul tevredenheid uitgespreek in gesprekke met mediaverteenwoordigers van NMH.

Kritiek oor die Lufthansa-geaffilieerde, wat intussen Discover Airlines geword het, neem egter al ’n geruime tyd toe.

Pogings om eenvoudige antwoorde vir die betrokke vlug op die internet te vind, het niks opgelewer nie.

Die media moes van tyd tot tyd na bewerings luister waarvolgens Discover kwansuis ’n monopolie op die plaaslike lugvaartroete geniet. Kritiek word gerig op steeds toenemende tariewe en vertragings, ’n beginsel wat blykbaar ’n impak op klaringsagentskappe het.

Net voor die plasing van die berig het Discover Airlines op navrae gereageer en hul reaksie sal môre geplaas word.