Besware geopper teen Fly Etosha

Ellanie Smit – FlyNamibia en sy filiaal, Westair Aviation, het amptelik beswaar teen die registrasie van Fly Etosha gemaak, met ernstige veiligheidskwessies wat as die hoofrede aangevoer word. Ander redes wat gelys is, sluit in ’n gebrek aan hulpbronne, instandhoudingsgeriewe vir die vliegtuie, grondhanteringsdienste, versekeringsdekking en personeel. FlyNamibia het aantygings verwerp dat sy besware daarop gemik is om nog ’n plaaslike lugredery en daarmee saam groter mededinging, te ontmoedig.Die nuwe redery se aansoek om lugvervoerdienste te verskaf is in die Staatskoerant van 23 Januarie gepubliseer en besware teen die voorgestelde lugredery kon tot Dinsdag by die Vervoerkommissie ingedien word. Dokumente is deur hul prokureursfirma Ellis en Vennote ingedien om Fly Etosha Airways se aansoek om niegeskeduleerde vlugte aan te bied, teen te staan. Kaptein William Ekandjo het die aansoek vir Fly Etosha ingedien. Hy is ’n afgetrede vlieënier wat wil terugploeg nadat hy dekades van kennis en ervaring by die voormalige nasionale lugredery Air Namibia opgebou het. Volgens FlyNamibia het Ekandjo nie bewyse verskaf dat hy ’n veilige, voldoende en betroubare lugdiens sal kan verskaf nie, veral in terme van volhoubaarheid, reëlmatigheid, stiptelikheid, redelike heffings en algemene doeltreffendheid.Ekandjo sê hy is nie bekommerd oor die besware wat ingedien is nie. “Dit is normaal in enige besigheid en kompetisie. Ons verwelkom enige mededinging,” sê hy. Hy sê as hulle nie aan die nodige vereistes van ’n lugredery voldoen het nie, sou hy nie aansoek gedoen het nie.“Dit is hulle opinie. Ons het wat mens die kontrolelys noem, gevolg en al die vereistes is in plek,” sê hy.Verder sê FlyNamibia Ekandjo het nie sy tariewe in sy aansoek gepubliseer nie, asook nie bewyse ingedien van voldoende kapitaal om ’n lugredery te begin en om ’n veilige, volhoubare diens te kan lewer nie.FlyNamibia se dokumentasie dui aan dat Ekandjo glo 12 vliegtuie ter waarde van tussen N$670 miljoen en N$950 miljoen besit. Hy beplan glo om 12 vliegtuie te huur wat maandeliks sowat N$74 miljoen sal kos. “Die aansoeker beplan om vliegtuie ter waarde van ongeveer N$1,6 miljard te koop,” lui FlyNamibia se beswaar. FlyNamibia sê Ekandjo het geen bewyse ingedien dat hy die vliegtuie besit nie, asook geen kontrak het met enige organisasie wat lugvaartdienste lewer nie. Hulle sê ook dat die vliegtuie wat op Ekandjo se aansoek aangedui word, gespesialiseerde grondtoerusting benodig, waarvoor daar ook geen ooreenkomste ingedien is nie.Bewyse van voldoende versekeringsdekking is glo ook nie verskaf nie. Verder het drie van die sewe vlieëniers se lisensies wat ingedien is, verval, asook 28 lisensies van die kajuitbemanning. “Die aansoek, soos dit nou staan, het ernstige kommer gewek oor die beplande lugredery se vermoë om die veiligheid van passasiers te verseker. ’n Onbetroubare lugredery met ernstige veiligheidsprobleme kan die hele Namibiese lugvaartbedryf negatief beïnvloed,” lui FlyNamibia se besware. As Fly Etosha goedkeuring van die Vervoerkommissie kry, moet dit steeds aansoek doen vir ’n lugoperateursertifikaat (AOC) wat deur die Namibië Burgerlugvaartowerheid (NCAA) uitgereik moet word. – republikein@republikein.com.na

Besware geopper teen Fly Etosha

Kommentaar

Republikein 2026-03-20

Meld asseblief aan om kommentaar te lewer

Besware geopper teen Fly Etosha

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.