Baierkraft brul in Namibië

Namibië is as die amptelike aanleg vir Baierkraft, die nuwe generasie motorfietse wat ontwerp is vir Afrika se uitdagende landskappe, aangewys.

Dié besluit plaas Namibië nie net in die middel van die vasteland se speelveld vir entoesiaste nie, maar skep ook nuwe werksgeleenthede vir plaaslike gemeenskappe.

Baierkraft word gelei deur Torben Baier, ’n Duitse ingenieur met byna 20 jaar se internasionale ervaring in grootskaalse motorprojekte, insluitend as bestuurder van die A4- en A5 Facelift-modelle.

’n Skielike terugslag in sy gesondheid toe hy met veelvuldige sklerose gediagnoseer is, het Torben nie sy visie laat vaar nie. Dit het inteendeel gelei tot die geboorte van ’n nuwe konsep in Namibië, 12 000 kilometer van sy tuiste in Duitsland.

Baierkraft is vier jaar gelede ontwikkel met die eerste reeks motorfietse wat in Augustus vanjaar in Namibië  beskikbaar sal wees. Torben het ’n groot liefde vir die land en sê Namibië se landskap en klimaat het ’n groot rol gespeel in die besluit om die aanleg juis hier op te rig. 

“In ontluikende markte neem die vraag na individuele mobiliteit toe. Baierkraft wil oplossings bied waar ander handelsmerke nie aan die spesifieke behoeftes van die kliënt voldoen nie. 

“Ons motorfietse word hier in Afrika met ’n hoë vlak van vakmanskap aanmekaargesit. Die doel van ons ingenieurspan is altyd om die perfekte motorfiets vir uitdagende omstandighede te bou; ’n fiets wat onder moeilike omstandighede, hitte en stof, en met die verloop van tyd, steeds volhoubaar bly,” verduidelik Torben.

Baierkraft streef daarna om Namibiërs die geleentheid te bied om deel van die handelsmerk te wees, met die moontlikheid om die motorfietse in die toekoms ook na  Oos- en Wes-Afrika uit te voer. 

“Namibië beskik oor ’n uitstekende spoornetwerk tot by die Walvisbaai se hawe en het operasionele handelsooreenkomste wat interne lokalisering  vergemaklik.

“Ons verwag om meer as 200 Namibiërs in 2027 aan te stel. Ons is trots om saam met verskeie vennote te werk, insluitend die Universiteit van Kiel, die Universiteit van Aken en die Universiteit van Flensburg in Duitsland insluit,” sê Torben.

’n Kernfokus van Baierkraft is diens en betroubaarheid. 

Van die uitdagings sluit in die koste vir kliënte wanneer die fabriek stilstaan, “want dit kos geld”. 

“Daarom fokus ons van dag een af op diens. Om stil te staan is een van die grootste verborge koste in vloot- en professionele bedrywighede.

“Ons motorfiets wat binnekort bekend gestel word, die ORYX 300, is gebou om maklik te diens, ondersteun deur plaaslike diensnetwerke wat naby geleë is aan beide die motorfiets en die mense wat daarop staatmaak,” sê hy. 

Die ORYX 300 is nie net robuust nie, maar ook veelsydig.

“Ons begin met ’n 300cc-verbrandingsenjin, maar die raam en platform is ten volle skaalbaar vir ander enjinopsies en selfs battery-elektriese voertuigtegnologie in die toekoms,” verduidelik Torben. 

Die kenteken van die Baierkraft-handelsmerk is ’n gemsbok en simboliseer dié dier se eienskappe  – sterk, veerkragtig en vinnig om aan te pas. Die staal- en amberkleure verteenwoordig duursaamheid en gehalte. 

“Ons het van die begin af die doel gehad om ’n bekostigbare motorfiets te ontwikkel wat die vasteland kan revolusioneer. 

“Daarom mik ons na ’n prys wat vir Namibiërs bereikbaar is, teen ’n fraksie van die koste,” sê Torben. 

– [email protected]