‘Air Namibia se vliegtuie is onderduims verkoop’

Ogone Tlhage – Air Namibia se likwidateurs Bruni en McLaren het na bewering ’n aanbod van die Kameroense maatskappy ZeJet ontvang vir die aankoop van die bankrotlugredery se vier Embraer 135-stralers.Die maatskappy het ’n aanbod van N$68 miljoen gemaak vir die vliegtuie asook die grondhanteringstoerusting. Die aanbod is vervat in ’n brief van ZeJet se uitvoerende hoof, mnr. Christophe Semengue, aan Bruni en McLaren, sowel as die waarnemende uitvoerende hoof van Air Namibia, mnr. Stanley Kariko. Die voorgestelde transaksie sal behels dat ZeJet die toerusting en vliegtuie in vier verskillende transaksies betaal. Die eerste stap is die aankoop van toerusting vir sowat N$1,56 miljoen, die tweede vir onderdele en verbruiksgoedere ter waarde van N$14,7 miljoen, die derde twee vliegtuie vir N$26 miljoen en die vierde die oorblywende twee vliegtuie vir N$26 miljoen. Die nuutgestigte lugredery stel ook voor dat die laaste twee vliegtuie in ontvangs geneem word wanneer al die transaksies afgehandel is. ZeJet het onlangs die groenlig gekry om met hul werksaamhede te begin en ding met Kameroen se staatsbeheerde lugredery, Camair-Co, mee.LUGVAARTVENNOTEIntussen het die lugvaartvennote Progress Aviation en AB Airlines Bruni & McLaren CC daarvan beskuldig dat hulle oneties optree. Dit nadat die likwidateurs na bewering geweier het om die aanbod te oorweeg wat die vennote gemaak het vir twee Embraer 135-stralers - wat hulle van plan was om te koop ná die lugredery se ondergang verlede jaar.Hulle beweer verder die plaaslike redery Fly Namibia (voorheen FlyWestair) kon dié vliegtuie vir ’n appel en ’n ei koop, ondanks die feit dat hulle voorheen geen belangstelling getoon het nie.In ’n brief aan mnr. Iipumbu Shiimi, die minister van finansies, het Progress Aviation en AB Airlines gesê die likwidateurs het oneerlik opgetree. Bruni & McLaren het glo aanbiedinge van ander maatskappye opsy geskuif en eerder die vliegtuie onder markwaarde aan Fly Namibia verkoop.Fly Namibia het glo aangebied om N$44,9 miljoen te betaal, ver onder die markwaarde van die Embraers, wat N$60,4 miljoen werd is.BEKOMMERD“Ons by Progress Aviation en AB Airlines is uiters bekommerd oor die onregverdige en oneerlike behandeling wat ons van die likwidateurs ontvang het tydens die bieproses,” lui die brief.Die vennote het gesê hulle het na Kariko uitgereik, wat hulle aangeraai het om na Namibië te reis om die vliegtuie, wat in September in die mark sou wees, te inspekteer.“Ons is ingelig dat verskeie tenders ingedien is, maar afgekeur is. Daarom het hulle voorgestel dat ons invlieg om na die vloot en die gepaardgaande bepalings te kyk en onmiddellik ’n tender in te dien.”Toe maatskappyverteenwoordigers op 7 November in Windhoek aankom, het Kariko hulle na bewering ingelig dat die vliegtuie verkoop is, en hulle vir verdere navrae na mnr. David Bruni van Bruni & McLaren verwys.‘VOLDOEN AAN VEREISTES’Progress Aviation en AB Airlines het voorts aangevoer hulle het voldoen aan alle vereistes wat Bruni & McLaren vir die aankoop van vliegtuie gestel het, maar nie regverdig behandel is rakende dié transaksie nie.Die vennote het verder ’n bewys dat die vliegtuie verkoop is van die likwidateurs aangevra, maar het nog geen reaksie ontvang nie.“Ons het versoek dat die likwidateurs bewys lewer van die bieër se betaling en die proses wat gevolg is, aangesien ons aangeraai is om na Namibië te reis en ons aanbod in te dien volgens die likwidateur se vereistes, siende dat dit oop was vir alle belanghebbendes,” het hulle gesê.“Gevolglik voel ons dat ons nie tydens hierdie proses met eerlikheid, deursigtigheid of regverdigheid behandel is nie. Ons versoek met respek dat [Shiimi se] kantoor ons ’n regverdige bieproses gun.”MINISTER REAGEERDie minister het verlede week gesê die regering het geen manier gehad om die uitslag van die likwidasieproses te beïnvloed nie.“As aandeelhouer word die regering volgens wet nie toegelaat om by die proses in te meng nie. Dit is die verantwoordelikheid van die meester van die hoërhof, wat likwidateurs aanstel,” het Shiimi gesê.Bruni wou nie kommentaar oor die aangeleentheid lewer nie en het medianavrae na Kariko verwys, terwyl mnr. André Compion, uitvoerende hoof van Fly Namibia, die bewerings ontken het dat sy maatskappy die vliegtuie bekom het in ’n transaksie waarby Air Namibia se likwidateurs betrokke was.Kariko het navrae weer na Bruni terugverwys en botsende belange as rede aangevoer. – republikein@republikein.com.na

‘Air Namibia se vliegtuie is onderduims verkoop’

Kommentaar

Republikein 2026-08-03

Meld asseblief aan om kommentaar te lewer

‘Air Namibia se vliegtuie is onderduims verkoop’

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.