Vrae oor sluiting van Gross Barmen-swembad

Die Independent Patriots for Change (IPC) se Rodrick Likando het ’n beroep op die minister van die omgewing, bosbou en toerisme, Indileni Daniel, gedoen om die tydelike sluiting van die binnenshuise swemgeriewe by die Gross Barmen-oord buite Okahandja te verduidelik. Dit volg op ’n verklaring van die Namibia Wildlife Resorts (NWR) gedateer 15 Oktober, waarin die publiek ingelig word dat die binnenshuise swemgeriewe van die oord met onmiddellike effek tydelik gesluit word om voorsiening vir die nodige herstelwerk te maak.Likando het gesê hy is bekommerd oor die veiligheidskwessies wat tot die besluit gelei het, terwyl hy ook kommer uitgespreek het oor die aanwending van openbare fondse.In ’n kennisgewing aan die parlement het Likando gesê dat, gegewe die oord se belangrikheid vir toerisme en die aansienlike openbare belegging wat die oord ontvang het, dit noodsaaklik is om vas te stel waarom dit gesluit is en watter maatreëls getref word om die geriewe weer veilig oop te maak.“Die Huis moet ingelig word oor die aard van die probleme, die finansiële implikasies en die stappe wat gedoen word om die geriewe veilig te heropen,” het hy gesê.Likando wou weet watter spesifieke veiligheidskwessies tot die sluiting gelei het, wie dit geëvalueer het en wanneer dit vir die eerste keer geïdentifiseer is. Hy wou ook van die minister weet waarom die betrokke geriewe steeds oop vir die publiek was, nadat die probleme aan die lig gekom het. Hy soek ’n verduideliking wie daarvoor verantwoordelik gehou gaan word, indien daar versuim is om op te tree.Likando soek ook antwoorde oor staatsgeld wat tussen 2022 en 2014 aan die herontwikkeling van die oord bestee is, of die huidige gebreke met dit verband hou en wat die koste van herstelwerk sal beloop. Hy het ook duidelikheid gesoek oor wie die koste van die herstelwerk sal dra en wanneer die werk voltooi sal wees sodat die geriewe weer heropen kan word.“Gross Barmen is ’n openbare bate wat met belastingbetalers se geld gebou en in stand gehou word. “Namibiërs wat daarvan afhanklik is vir ontspanning, gesondheid en hul lewensbestaan, het die reg om te weet dat dit veilig is en goed bestuur word,” het Likando gesê.Die minister is ook gevra om verantwoording te doen oor die opbrengste wat die regering sedert 2014 op sy belegging in die herontwikkeling van die vakansieoord ontvang het. – aurelia@nmh-hub.com.na

Vrae oor sluiting van Gross Barmen-swembad

Kommentaar

Republikein 2026-10-22

Meld asseblief aan om kommentaar te lewer

Vrae oor sluiting van Gross Barmen-swembad

Kommentaar

Republikein 2026-10-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.