Volhoubaarheid ’n dryfveer vir toerisme

“Kan besigheidswaarde uit volhoubaarheidsdata geskep word?” ’n Aantal kenners het dié vraag tydens ’n paneelbespreking, wat as deel van die verrigtinge van die gesogte toerismeskou ITB Berlin 2026 plaasgevind het, ondersoek. Die bespreking is moontlik gemaak deur die Deense konsultasiefirma BeCause.BeCause is ’n tegnologiemaatskappy vir volhoubaarheid in Kopenhagen wat ’n gespesialiseerde dataspilpunt en platform vir die reis-, toerisme- en gasvryheidsbedrywe bied.Die sagteware sentraliseer en outomatiseer die insameling, bestuur en deel van omgewings-, maatskaplike en bestuursdata (ESG) – insluitend ekosertifiserings, nutsverbruik-nasporing en raamwerke vir volhoubaarheid. Dit stel hotelle, toeroperateurs, bestemmings en besprekingsplatforms in staat om verslagdoening, nakoming en deursigtigheid stroombelyn te maak.Tydens die kort maar betekenisvolle bespreking het dit duidelik geword dat die begrip van die term en konsep “volhoubaarheid” steeds wyd betwis word en nog nie tot ’n eenvormige meetstelsel gelei het nie.BeCause se hoof- kommersiële beampte, Jahanzeeb Ahmed, het herhaal volhoubaarheid sou betekenisloos wees as dit nie konsekwent gemeet en in sinvolle uitkomste omskep kan word en oor ’n toerisme-operateur se netwerk van verskaffers en kliënte gedeel kan word nie. Ahmed beskou volhoubaarheid as ’n sleuteldryfveer van mededingendheid in terme van inkomste en koste, maar ook langtermyn-geloofwaardigheid.Danielle D’Silva, die direkteur van volhoubaarheid by Booking.com, het klem gelê op die skep en beskikbaarstelling van stelsels en oplossings wat die kliënt bevoordeel. Sy bepleit ’n holistiese volhoubaarheidstrategie wat die ontwikkeling en uitvoering van ’n maatskappy se globale volhoubaarheidsagenda lei. D’Silva meen dat verbruikers toenemend gewillig is om alternatiewe te aanvaar – wat kan insluit dat sekere prestasievlakke prysgegee word – mits die boodskap duidelik gekommunikeer en die voordele van volhoubare oplossings verstaan word.Peter Andrews, die senior direkteur van globale programme, beleide en openbare sake en personeelhoof by die World Sustainable Hospitality Alliance, ondersteun die konsep “NetPositiveHospitality” wat deur dié organisasie ontwikkel is.Hy het aangevoer dat konsekwente data-insameling noodsaaklik is om volhoubaarheid te bevorder, veral “as ons verwag dat mense vir iets moet betaal wat hulle nie kan meet nie”.Volgens Andrews moet verbruikers verstaan hoe standaarde in lyn gebring word en watter robuuste metodologieë toegepas word. Hulle benodig ook duidelikheid oor waar ’n organisasie in sy volhoubaarheidsreis staan, gebaseer op realistiese assesserings en deursigtige maatstafprosesse om langtermyn-geloofwaardigheid te verseker.Sara Diguesi van BWH Hotels (in Egipte, Oman en ander markte) het beklemtoon dat meting slegs konsekwent kan wees as ’n gedeelde boodskap en gemeenskaplike standaarde oor ’n groep heen toegepas word. Sy het toerisme-organisasies aangemoedig om te begin, maak nie saak hoe klein die eerste stappe is nie, aangesien die proses beide belangrik en tydrowend is as dit reg benader word.Die korporatiewe direkteur van ESG en behaltebestuur by Orascom, dr. Renée Nicole Wagner, het beklemtoon dat die konsekwente insameling en vaslegging van data ’n lewenswyse moet word.Sy beskou die deel van sulke inligting as noodsaaklik – nie net met kliënte nie, maar ook onder personeel – om vordering na te spoor en vertroue te bou. Uiteindelik, het sy aangevoer, word deursigtigheid deel van die toerisme-operateur se sake-aanbod.Al die paneellede het saamgestem dat verbruikerservarings in vandag se wêreld toenemend deur die lens van volhoubaarheid beoordeel word. Verbruikers is bereid om kompromieë aan te gaan, mits hulle die denkwyse daaragter verstaan en dit ondersteun.– fsteffen@nmh-hub.com.na#EnjoyMyITB2026

Volhoubaarheid ’n dryfveer vir toerisme

Kommentaar

Republikein 2026-08-03

Meld asseblief aan om kommentaar te lewer

Volhoubaarheid ’n dryfveer vir toerisme

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.