Verantwoordelike toerisme seëvier

Die toerisme-operateur Wilderness Namibia het die afgelope dekade ’n aansienlike ekonomiese en maatskaplike impak in Namibië gemaak, deur miljarde in die plaaslike ekonomie in te pomp terwyl dit die lewensbestaan van landelike gemeenskappe oraloor die land verbeter.

Volgens die maatskappy se jongste impak-oorsig wat die tydperk 2016 tot 2025 dek, het Wilderness Namibia tans 400 mense in diens. ’n Opvallende 69% van hierdie poste is in afgeleë landelike gebiede waar werksgeleenthede skaars is. 

Die aard van die luukse-toerismesektor beteken dat die maatskappy se bedrywighede uiters arbeidsintensief is. Gemiddeld stel Wilderness Namibia 2,5 personeellede aan vir elke bed vir gaste in sy kampe om die hoë standaarde te handhaaf wat by luukse safarilodges verwag word. 

MODEL

Hierdie model beklemtoon die ekonomiese waarde van Namibië se hoë-waarde, lae-volume toerismestrategie, wat sowel bewaring as gemeenskapsontwikkeling bevoordeel. 

Oor die afgelope tien jaar het Wilderness Namibia meer as N$691 miljoen in salarisse aan sy arbeidsmag betaal. Hierdie lone sirkuleer binne plaaslike ekonomieë en vermenigvuldig inkomste vir families en klein ondernemings. 

Die maatskappy skat dat elke werknemer gemiddeld byna agt familielede onderhou, wat beteken dat ongeveer 3 000 mense direk baat vind by die lewensbestaan wat deur die organisasie geskep word. 

Die maatskappy het ook ’n aansienlike bydrae tot staatsinkomste gelewer deur belasting en heffings. Loonbelasting alleen het in normale jare jaarliks tussen N$12 miljoen en N$13 miljoen opgelewer, met ’n totaal van nagenoeg N$87 miljoen oor die afgelope dekade. Daarbenewens het betalings aan gemeenskappe gedurende dieselfde tydperk N$72 miljoen oorskry, en dit het gestyg van ongeveer N$9 miljoen per jaar voor die Covid-19-pandemie tot meer as N$12 miljoen in die 2025-boekjaar. 

Benewens indiensneming en belastingbydraes het Wilderness Namibia ongeveer N$1,5 miljard in die plaaslike ekonomie aan goedere en dienste bestee, terwyl dit meer as N$249 miljoen in sy Namibiese bedrywighede belê het. 

Filantropie en gemeenskapsontwikkeling vorm ook ’n kerndeel van die organisasie se impak. Oor die afgelope paar jaar het Wilderness Namibia ’n verskeidenheid inisiatiewe vir gemeenskappe ter waarde van byna N$5 miljoen ondersteun. 

GESONDHEID

Hierdie projekte sluit die skenking van ’n volledig toegeruste mobiele kliniek ter waarde van N$1,5 miljoen aan die ministerie van gesondheid en maatskaplike dienste in.

Die kliniek is by Otjinungua om gemeenskappe te bedien wat in en rondom die kommunale bewaringsgebied van Marienfluss woon, waar die naaste gesondheidsgeriewe voorheen sowat 325 km vanaf Opuwo geleë was. 

Tydens die Covid-19-pandemie, toe toerisme in duie gestort het en naburige gemeenskappe ernstige ontbering beleef het, het Wilderness Namibia grootskaalse pogings vir voedselverligting gekoördineer. 

Met ondersteuning van skenkers en vennote het die organisasie meer as 2 540 voedselpakkies versprei – altesaam 65 ton kos – wat meer as 10 000 mense bereik het teen ’n koste van ongeveer N$2,16 miljoen. 

DROOGTE

Verdere verligting is laat in 2024 gebring toe die erge droogtetoestande gemeenskappe in die Kunenestreek geraak het.

Meer as 1 500 bykomende voedselpakkies is aan behoeftige gesinne teen ’n koste van sowat N$900 000 verskaf. Ander inisiatiewe sluit die installering van ’n sonkrag-waterpomp in Otjinungua in, wat inwoners in staat stel om toegang tot veilige water te kry sonder om die gevaarlike Kunenerivier vol krokodille te trotseer. 

Die organisasie het ook begin om vee in droogtegeteisterde gemeenskappe aan te vul met meer klimaatbestande alternatiewe om tradisionele lewensbestaan te ondersteun. 

ONDERWYS

Onderwys bly nog ’n sleutelpilaar van Wilderness Namibia se maatskaplike belegging.

Deur programme soos Children in the Wilderness neem honderde kinders jaarliks deel aan Eko-klubs en omgewingsonderrigkampe wat daarop gemik is om bewaringsbewustheid en leierskap onder jongmense te inspireer. Oor die afgelope dekade het die organisasie ondersteuning ter waarde van meer as N$11 miljoen aan landelike skole verskaf, terwyl dit 312 beurse ter waarde van ongeveer N$1,84 miljoen aan studente toegeken het. 

OMGEWING

Uit ’n omgewingsperspektief versterk die maatskappy steeds volhoubare bedrywighede oor sy kampe heen. Sy sewe kampe het tans ’n gekombineerde sonkrag-opwekkingskapasiteit van 378 kilowatt, terwyl nakoming van die groep se omgewingsminimumstandaarde op 77% staan. 

Byna 100 000 gaste is die afgelope dekade by Wilderness Namibia se sewe kampe gehuisves wat ’n gebied van ongeveer 1,07 miljoen hektaar beslaan. Die maatskappy sê sy langtermyn-benadering toon hoe verantwoordelike toerisme terselfdertyd die natuur se landskappe kan beskerm, landelike gemeenskappe kan bemagtig en betekenisvol tot nasionale ekonomiese groei kan bydra. 

Deur indiensneming, gemeenskapsvennootskappe en bewaringsgedrewe toerisme bewys Wilderness Namibia dat die sektor steeds ’n belangrike rol kan speel om Namibië se volhoubare ontwikkelingsdoelwitte te bevorder.

Terselfdertyd verseker dit dat die voordele van toerisme die mense bereik wat die naaste aan die land se ikoniese wildernisgebiede woon.

– [email protected]