Toerisme Ekspo op koers vir 2024

Frank Steffen - In die lig van Wêreldtoerismedag wat gister gevier is, het die minister van die omgewing, bosbou en toerisme, Pohamba Shifeta, die 2024 Toerisme Ekspo van stapel gestuur. Dié jaarlikse geleentheid word deur Namibia Media Holdings (NMH) gefasiliteer en sal volgende jaar van 24 tot 26 April plaasvind. Op die pad vorentoe sal NMH fokus op die bevordering van die Kavango-Zambezi-oorgrensbewaringsgebied (Kaza TFCA) as deel van sy “Beyond Borders”-toerisme-inisiatief.“Dit is hierdie tema wat ons daartoe gelei het om die Kaza te bevorder, aangesien dit die toonbeeld is van waarvoor Afrika-eenheid staan. Vyf Afrika-buurlande span kragte saam om die dienste wat aangebied word te maksimaliseer tot voordeel van besoekers en die mense van hierdie streek. Dit bewys hoeveel meer bereik kan word as ons ons pogings verder as net daardie een bewaringsgebied strek,” het NMH se Frank Steffen gesê.Om die program af te skop is ’n praatjie gespeel deur dr. Nyambe Nyambe, die direkteur van die Kaza-sekretariaat, wat onlangs opgeneem is by die kwadripunt waar Botswana, Namibië, Zambië en Zimbabwe mekaar via die Zambezirivier ontmoet.Nyambe het gewys op die belangrikheid van toerisme wat die ruggraat van die Kaza-park is, maar het klem gelê op die feit dat Kaza meer as net toerisme behels, aangesien dit uit parke en bewaringsgebiede bestaan, terwyl dit ook groeipotensiaal toon in ander bedrywe.Shifeta het gesê die doelwitte van die Toerisme Ekspo is nie net in lyn met die streekdoelwitte van die SADC-streek nie, maar met internasionale tendense en benaderings. “Die Verenigde Nasies se Wêreldtoerisme-organisasie (UNWTO) het beleggings geïdentifiseer as een van die sleutelprioriteite vir die herstel van die toerismesektor en toekomstige groei en -ontwikkeling. Vir Wêreldtoerismedag 2023 beklemtoon die UNWTO die behoefte aan meer en beter geteikende beleggings. Dit is nou die tyd vir nuwe en innoverende oplossings, nie net tradisionele beleggings wat ekonomiese groei en produktiwiteit bevorder en ondersteun nie, maar een wat ook fokus op welvaart vir die mense en die planeet.”Die minister beskou die Wêreldtoerismedag as ’n “aansporing tot aksie vir die internasionale gemeenskap, regerings, multilaterale finansiële instellings, ontwikkelingsvennote en beleggers in die private sektor om te verenig rondom ’n nuwe toerismebeleggingstrategie en nuwe maniere om onvergeetlike en lewensveranderende ervarings vir reisigers na ons bestemmings te bied.” Hy het die pogings geloof wat NMH aangewend het om Namibië oor grense te bemark – ’n beginsel wat by die UNWTO resoneer. Shifeta het gesê hy glo dat die ekspo “Namibië as ’n voorkeurbestemming oraloor die wêreld kan bemark”.DIAMANTWENNER Die Namibia Diamond Trading Company (NDTC) het sy steun aan die Toerisme Ekspo betoon deur ’n diamant ter waarde van N$100 000 te skenk. Die waarnemende uitvoerende hoof van die NDTC, Paulus Shituna, het verduidelik hoe sy maatskappy waarde tot die land toevoeg – meer spesifiek tot die toerismebedryf. “Almal wil ’n Namibiese diamant hê, aangesien ons diamante meer waardevol is.”Altesaam 5 704 mense het aanlyn aan dié diamantkompetisie deelgeneem en Simeon Shaanika is uiteindelik gister as die wenner aangewys. NDTC het die naaswenners genooi om ’n toer deur die aanleg te onderneem en hulle sal gratis koopbewyse ter waarde van N$1 000 van NMH ontvang wat hulle by volgende jaar se ekspo kan gebruik. Die volledige program sal eerskomende Sondag om 11:00 op NTV (DStv kanaal 285 of GOtv kanaal 25) uitgesaai word. – republikein@republikein.com.na

Toerisme Ekspo op koers vir 2024

Kommentaar

Republikein 2025-04-30

Meld asseblief aan om kommentaar te lewer

Toerisme Ekspo op koers vir 2024

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie