‘Swak netwerkdekking kniehalter toerisme’

Die Gasvryheidsvereniging van Namibië (HAN) het kommer uitgespreek oor verswakte telekommunikasie en internetverbinding in Namibië se landelike gebiede en gewaarsku dat onbetroubare dienste toenemende druk op die toerismesektor plaas.

In ’n brief aan MTC se besturende direkteur, Licky Erastus, het die vereniging gesê swak netwerkdekking, herhalende onderbrekings en hoë verbindingskoste ontwrig toerismebedrywighede, veral in afgeleë streke waar kommunikasiestelsels noodsaaklik vir besprekings, betalings, gastedienste en noodgevalle is.

HAN het gesê moderne toerisme is toenemend afhanklik van vinnige en betroubare internettoegang, en het telekommunikasie beskryf as ’n noodsaaklike besigheidsvereiste, eerder as ’n luukse.

Volgens die vereniging het baie lodges en kampe in afgeleë gebiede al jare lank mislukte inkomende en uitgaande oproepe, onstabiele internetverbindings en langdurige diensonderbrekings ervaar wat die daaglikse bedryf raak.

“Soos dit nou staan, is Namibië besig om vinnig sy mededingendheid te verloor,” het HAN gesê en gewaarsku dat toerismebesigheid toenemend na buurlande herlei word wat sterker en meer bekostigbare telekommunikasiedienste bied.

Die vereniging het gesê sommige toerisme-operateurs identifiseer bekostigbare en betroubare internettoegang al vir meer as 20 jaar as hul “enkele grootste beperking op groei”.

HAN het opgemerk dat baie operateurs tans op Telecom Namibia se Airfibre- of WiMAX-dienste teen ’n koste van sowat N$10 000 per maand staatmaak, ondanks kommer oor betroubaarheid en beperkte kapasiteit.

Weens onvoldoende diensvlakke het sommige ondernemings glo oorgeskakel na alternatiewe satellietstelsels wat wettig in Namibië is, dikwels teen aansienlik hoër koste.

Volgens voorleggings wat HAN ontvang het, betaal sommige lodges tot N$37 000 per maand vir ’n twee teragrepe-pakket met ’n dataplafon, wat slegs voldoende is vir besigheidstelsels en gaste se internetgebruik uitsluit.

– [email protected]