Namibië in die kollig by gasvryheidsforum

Ellanie Smit - Die Africa Hospitality Investment Forum (AHIF), die voorste toerisme- en gasvryheidsbeleggingskonferensie in Afrika, sal van 25 tot 27 Junie 2024 in Windhoek gehou word. Dit is die eerste keer dat die konferensie, wat talle prominente internasionale hoteleienaars, beleggers, finansiers, bestuursmaatskappye en hul adviseurs lok, in ’n SADC-land sal plaasvind.Luidens ’n verklaring deur AHIF sal die konferensie by die Mövenpick- en Mercure-hotelle in Windhoek aangebied word.Albei eiendomme ondergaan ’n totale gedaanteverwisseling nadat hulle in 2021 deur ’n fonds wat deur Kasada Capital Management bestuur word, oorgekoop is.Die naweek voor die konferensie sal die forum verskeie reise onderneem om van Namibië se beste gasvryheidsbeleggingsprojekte en toerisme-aantreklikhede te sien.“Dit sluit skouspelagtige woestyntonele in, ontsagwekkende avontuursporte en safari’s waarop dit moontlik is om bedreigde swart-en-witrenosters, wildsbokke, jagluiperds, olifante, kameelperde, seekoeie, leeus, volstruise en sebras te sien.”Hierdie reise sal nie net opvoedkundig wees nie, maar sal ook waardevolle netwerkgeleenthede verskaf, het AHIF gesê.POTENSIAALIn die sewe jaar voor die Covid-19-pandemie het Namibië se toerismesektor konsekwent gegroei, luidens die verklaring.Volgens die ministerie van die omgewing, bosbou en toerisme het toerismegetalle met sowat 5% per jaar gegroei van net minder as 1,2 miljoen in 2012 tot 1,6 miljoen in 2019.“Die pandemie het egter die land se toerismebedryf geknou, met die getal aankomende besoekers wat in 2020 tot onder 200 000 gedaal het.”Sedertdien het dié getal in 2021 met 40% herstel en in 2022 met 98,1% tot 461 027 gespring.“Om die bod te wen om AHIF 2024 aan te bied is nie net ’n oorwinning vir Namibië nie, maar ook ’n bevestiging van ons nasionale potensiaal. Ons is verheug om die internasionale beleggingsgemeenskap in gasvryheid te verwelkom om die onbenutte beleggingspotensiaal van ons toerismebedryf te verken,” het Nangula Uaandja, die voorsitter en uitvoerende hoof van die Namibiese Raad vir die Bevordering van Beleggings en Ontwikkeling (NIPDB), gesê. Sy het gesê Namibië is ’n land met ’n opvallende skoonheid en skilderagtige landskappe wat met die eerste oogopslag sal bekoor.“Meer nog, ons is ’n land wat daartoe verbind is om ons mense te ontwikkel deur buitelandse beleggings te lok wat ekonomiese bedrywighede en werkskepping bewerkstellig.”BELEGGINGS IN AFRIKA Volgens Olivier Granet, die uitvoerende hoof, en David Damiba, die hoof-inligtingsbeampte, sien hulle uit daarna om gaste by Kasada se Mövenpick- en Mercure-hotelle ná die opgraderingswerk te verwelkom.“Die volledige opknapping by Namibië se voorste hotelkomplekse en konferensiesentrum getuig van ons strategie om kapitaal en kundigheid in te bring om die gasvryheidsektor in sleutelstede regoor Afrika te verbeter.”Intussen het Matthew Weihs – besturende direkteur van The Bench, wat AHIF organiseer – gesê hulle is baie opgewonde dat die geleentheid volgende jaar vir die eerste keer in ’n SADC-land aangebied word.“Belegging in Afrika gaan alles daaroor om nuwe geleenthede te vind en aan te gryp.”- republikein@republikein.com.na

Namibië in die kollig by gasvryheidsforum

Kommentaar

Republikein 2025-05-01

Meld asseblief aan om kommentaar te lewer

Namibië in die kollig by gasvryheidsforum

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie