Koebaai Etosha

Toeroperateurs en motorverhuringsmaatskappye is keelvol vir leë beloftes oor die uiters swak toestande van paaie in die Etosha Nasionale Park en het begin om hul voertuie uit die park te onttrek. Rohl’s Tours & Safaris het in ’n kennisgewing gesê: “Ons is hartseer om te sê dat ons maatskappy vanaf 1 Desember nie meer die park met ons voertuie sal binnegaan nie. Die mense in beheer van die park het ons as ’n nasie in die steek gelaat, hulle het toerisme in die steek gelaat,” aldus die kennisgewing. Die rede is die "aaklige" paaie en hul voertuie, busse en huurvoertuie wat breek en uitmekaar val. “Ons sal steeds die lodges naby Etosha ondersteun, van hul wildbesigtigingsvoertuie gebruik maak of ons sal private wildreservate ondersteun wie se paaie en dienste aan die verwagtinge voldoen.“Dit is baie hartseer dat die mense in beheer nie hul fokus op die reuseprobleem geplaas het nie.”Chameleon Safaris gaan ook nie meer die park met hul voertuie binnegaan nie. Hulle kan ongelukkig nie uit die park bly nie, maar kan van private wildbesigtigingsvoertuie gebruik maak. “Die skade aan ons voertuie en toenemende koste vir instandhouding het buite beheer geraak.”Intussen het voertuigverhuringsmaatskappye aangekondig hulle het reeds besluit om uit sekere gebiede in die park soos Etosha-Wes te bly. Die ministerie van die omgewing, bosbou en toerisme belowe reeds sedert die begin van die jaar dat die paaie in Etosha verbeter sal word en het onlangs herhaal dat dit voor die feesseisoen gedoen sal word. Die ministerie erken toeriste en toeroperateurs se kommer oor “sommige paaie” in die park en gee in ’n verklaring die versekering dat dit as ’n dringende kwessie hanteer sal word. Die grootste kommer is die pad vanaf Okaukuejo na Namutoni, sê die ministerie se woordvoerder, Romeo Muyunda. Volgens hom is die rede vir die swak toestand van die pad die hoë volumes verkeer wat lei tot ’n verlies aan gruis, slaggate en dreineringsprobleme.As ’n onmiddellike oplossing, sê Muyunda het die ministerie drie padskrapers ontplooi om die paaie vanaf Halali na Namutoni, Okaukuejo na Halali en Namutoni na die King Nehale-hek te skraap. “Ons verwag dié ingryping sal die toestand van die paaie in die spesifieke dele binne ’n tydperk van twee weke verbeter,” het hy gesê.As ’n langtermynoplossing sal die opgradering van die paaie van gruis na teer binnekort begin.Die paaie wat geïdentifiseer is, is die stuk vanaf Okaukuejo, Halali, Namutoni tot by King Nehale.Volgens Muyunda het die ministerie sedert 2018 die westelike gedeelte van die toeristepad vanaf Okaukuejo na Galton-hek gerehabiliteer en het meer as 200 kilometer teen Maart 2024 opgegradeer. “Terwyl die kwessie getakel word, moedig ons besoekers aan om alternatiewe roetes vanaf Okaukuejo na Halali via Gemsbokvlakte, Olifantsbad en Aus te gebruik vir ’n beter reiservaring.”Besoekers en toergidse braak gereeld op sosiale media gal oor die verslegtende toestand van paaie in die park.Verskeie plasings verwys na hul geweldige frustrasie met die paaie wat “hop en skud” wat nie net die gemak van reisigers raak nie, maar uiteindelik ook ’n risiko vir voertuie en ook vir plaaslike toerisme inhou. Die ministerie het verlede jaar gesê ’n totaal van 224 kilometer paaie in die park is gerehabiliteer en waarvan 86 kilometer tot bitumen-standaard opgegradeer is. – republikein@republikein.com.na

Koebaai Etosha

Kommentaar

Republikein 2026-02-03

Meld asseblief aan om kommentaar te lewer

Koebaai Etosha

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.