Jag speel groot rol in toerisme-waardeketting

Ellanie Smit - Namibië se winsgewende jagbedryf groei steeds met rasse skrede, met die aantal geregistreerde jagplase wat die 600-kerf oorskry het.Jag speel ’n groot rol in die totale waardeketting van die toerismebedryf, met sowat 100 000 mense wat in die bedryf werksaam is en dus direk daarvan afhanklik is. Die president van die Namibiese Professionele Jagtersvereniging (Napha), Axel Cramer, het gesê data wat drie jaar gelede deur ’n navorsingsmaatskappy in Namibië beskikbaar gestel is, het bevind dat buitelandse jagters wat na Namibië reis tussen 3% en 5% van die totale toeriste-aankomste uitmaak, maar hulle sorg vir tot ’n kwart van die totale inkomste. “Ons het dus te doen met ’n lae-impak-kliënt, maar ’n hoëwaarde-toerismekliënt,” het hy gesê en bygevoeg jagters is ’n “baie waardevolle toeris om in Namibië te verwelkom”.STUDIES BENODIG Volgens Cramer is daar byna 600 geregistreerde jagplase in Namibië, waarvan sommige ten volle op jag fokus, terwyl ander jag en ander bedrywighede soos beesboerdery terselfdertyd beoefen.“Ons werk aan ’n ekonomiese navorsingstudie om uit te vind presies watter impak bewaringsjag op ons ekonomie het, ook vanuit die oogpunt van die private sektor. Baie data is oor bewaringsgebiede beskikbaar, maar nie soseer oor die private sektor nie. Dit is baie moeilik om te bepaal, maar jag is ’n groot deel van die toerisme-waardeketting.”NEGATIEWE IMPAK Cramer het verder gesê hulle glo die wetsontwerp voor die Britse parlement om die invoer van wildtrofeë te verbied, sal goedgekeur word. Hy het gesê in wese sal dit nie jag stop nie, maar buitelandse jagters sal dan nie toegelaat word om hul trofeë na die Verenigde Koninkryk (VK) terug te neem nie.Hy het gesê dit sal ’n beduidende negatiewe impak op Namibië hê. “Die VK is nie ’n sleutelmark vir Namibië nie, maar sal ’n impak op Namibië en Afrika as ’n geheel hê. Ons sleutelmarkte is steeds Europa in terme van Duitsland, Oostenryk en Switserland, die Duitse blok – soos ons dit noem – wat dan deur die VSA gevolg word.” – republikein@republikein.com.na

Jag speel groot rol in toerisme-waardeketting

Kommentaar

Republikein 2026-09-18

Meld asseblief aan om kommentaar te lewer

Jag speel groot rol in toerisme-waardeketting

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.