Condor hervat vlugte na Windhoek in 2027

Die Duitse lugredery Condor sal vanaf Junie 2027 direkte vlugte tussen Frankfurt en Windhoek hervat.

Die lugredery sal drie keer per week vlieg met vlugte wat op Dinsdae, Donderdae en Saterdae vanaf Frankfurt vertrek. Retoervlugte vanaf Windhoek sal op Woensdae, Vrydae en Sondae vertrek.

Windhoek was voorheen vanaf November 2014 tot 2021 deel van Condor se roetenetwerk, toe die diens gestaak is.

Met die aankondiging van die roete se terugkeer het Condor se uitvoerende hoof, Peter Gerber, gesê Namibië bly ’n gewilde bestemming onder Duitse reisigers.

“Met Windhoek, ’n bestemming wat jare lank deel van ons roetenetwerk was, keer dit na ons aanbod vir langafstandvlugte terug. Namibië is al jare lank ’n gewilde langafstandbestemming vir Duitse vakansiegangers,” het hy in ’n verklaring gesê.

Gerber het bygevoeg dat die direkte roete wat met die lugredery se moderne Airbus A330neo-vloot bedryf word, ’n aanloklike opsie vir beide vakansiereisigers en toeroperateurs sal bied, terwyl dit help om aan die groeiende vraag na reise na Suider-Afrika te voldoen.

Volgens Condor is kaartjies vir die roete tussen Frankfurt en Windhoek reeds vir bespreking beskikbaar.

– [email protected]