Buitensporige fooie vir vervalle erfenisgebiede

Ellanie Smit – Stewige prysverhogings vir toegang tot Namibië se erfenisgebiede het die toerismebedryf warm onder die kraag. Volgens die bedryf word van toeriste verwag om meer te betaal, maar niks word gedoen om die gebiede op te knap nie. Die nuwe toegangsfooie wat nou by erfenisgebiede in die land gehef word vir die 2024-’25-boekjaar het vandeesmaand in die Staatskoerant verskyn en tree op 1 April 2024 in werking. Gewilde besienswaardighede soos Twyfelfontein sal ’n volwasse buitelandse besoeker op ’n begeleide toer N$270 uit die sak jaag, terwyl dit net N$100 was vir die tydperk van April 2020 tot Maart 2022. ’n Begeleide toer na die Orrelpype of Brandberg kos N$250 vir internasionale toeriste teenoor die vorige prys van N$50. Vir die Versteende woud is dit N$270 vergeleke met N$100, en N$270 vir ’n begeleide toer na die Wit vrou van Brandberg waar dit voorheen N$100 gekos het. ’n Begeleide toer na die hoogste punt in Namibië, die Brandberg se Königstein-piek, gaan ’n internasionale besoeker N$2 400 per dag uit die sak jaag teenoor die vorige daaglikse koste van N$1 500. ’n Besoek aan die Hoba-meteoriet skiet van N$50 op tot by N$250. Waar mense dit voorheen op hul eie kon besoek, is dit nou ’n begeleide toer. OPERATEURSDelphin Ilunga, die eienaar van Furaha Tours and Safaris in Namibië en voorsitter van die Toer- en Safarivereniging van Namibië (Tasa) sê die bedryf is in die algemeen baie ontstig en teleurgesteld oor die prysverhogings wat oor minder as twee jaar met meer as 200% gestyg het. Volgens hom is die verhogings ingestel sonder dat die bedryf hieroor geraadpleeg is en sonder dat enige verbeterings aangebring is om dienslewering by die erfenisgebiede op te skerp. Ilunga sê baie toeroperateurs het nou besluit om dié gebiede heeltemal van hul reisplanne te verwyder – wat gaan lei tot inkomsteverliese. Hans Soltau, ’n besturende lid by Exclusive Africa Tours and Safaris se Namibiese tak, sê hulle was reeds ontsteld oor die eerste prysstygings vir die 2022-’23-boekjaar. Soltau het die stygings as belaglik afgemaak en gesê niks is die afgelope 20 jaar by erfenisgebiede gedoen nie. “En nou, uit die bloute, ná Covid, verdriedubbel hulle die pryse en maak dit nou nog duurder as ooit terwyl niks by die erfenisgebiede verander nie.“Mense wil nie eers meer soontoe gaan nie. Mense gaan nie Twyfelfontein toe nie, hulle besoek eerder besienswaardighede by Kamanjab. Otjikoto is byvoorbeeld verwaarloos. Ek weet nie waarom jy N$250 moet betaal om dit te sien nie,” het hy gesê.Soltau sê die Nasionale Erfenisraad is verantwoordelik vir die herstel en instandhouding van die erfenisgebiede, maar doen dit nie. “Toeroperateurs gaan nie na hierdie gebiede toe nie omdat dit eenvoudig te duur is. Selfs Etosha is goedkoper en ten minste kan jy sien iets word soms hier gedoen. By die erfenisgebiede word niks gedoen nie. Hulle antwoord is bloot dat fooie nie vir die afgelope 15 tot 20 verhoog is nie en dit is nou nodig.“Niemand het ’n probleem met prysverhogings as jy sien iets verander nie – as jy sien kantore word ordentlik onderhou, hulle het gidse wat ordentlik opgelei is en skoon badkamers. Jy kan egter by al hierdie geriewe gaan kyk, dis ’n nagmerrie!”Francois Visser van Levo Tours het die prysstygings as “uit en uit belaglik” beskryf.“Ons is besig om al hierdie erfenisgebiede van ons reisplanne af te haal. Die rede is omdat die geld nie die produk regverdig nie. As jy Twyfelfontein as voorbeeld vat, betaal jy met die nuwe fooie N$270 per kliënt om die rotsgravure te sien wat jou 45 minute neem om deur te stap.Kyk jy na Otjikotomeer (N$250) en die Hoba-meteoriet (N$250) wat jou nie eens vir tien minute besig hou nie, is dit nie die moeite werd om daardie tipe geld te betaal nie. Wys jy vir ’n persoon Twyfelfontein, die Orrelpype, Otjikoto en die meteorite, kyk jy na meer as N$1 000 per kliënt net om dit vinnig vir hulle te wys,” het hy gesê. Hy het beklemtoon die erfenisgebiede is in ’n swak toestand. Nathaly Ahrens, adjunkvoorsitter van Tasa, sê die meeste toeroperateurs het reeds die Verbrande Berg en die Orrelpype van hul toerplanne verwyder. Sy stem saam dat die pryse wat gevra word nie in verhouding is met die produk wat aangebied word nie. Die Erfenisraad sê op sy beurt hy is nie bewus van enige kommer of enige besware wat ontvang is oor die hersiende prysverhogings vir die 2023-’24 nie. Die raad is egter wel in kennis gestel van onderhoudskwessies by die gebiede wat “so goed as moontlik met beperkte finansiering” aandag geniet. – republikein@republikein.com.na

Buitensporige fooie vir vervalle erfenisgebiede

Kommentaar

Republikein 2026-03-20

Meld asseblief aan om kommentaar te lewer

Buitensporige fooie vir vervalle erfenisgebiede

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.