Angola gasheer van ITB Berlin 2026

Angola se deelname as gasheerland van vanjaar se grootste internasionale toerismeskou, ITB Berlin, beklemtoon dié land se groeiende rol in die dialoog van wêreldwye toerisme.Die Angolese minister van toerisme, Márcio de Jesus Lopes Daniel, het tydens die amptelike opening van dié gesogte toerismeplatform wat vanjaar vir die 60ste keer aangebied word, sy dank teenoor ITB Berlin, Messe Berlin en die stad Berlyn vir hul vennootskap uitgespreek. Hy het Duitsland ook as ’n belangrike vennoot uitgesonder. Lopes Daniel het reeds tydens die Globale Toerismeforum einde Januarie die land se missie benadruk om sy toerismebedryf ’n hupstoot te gee. Hy het verwys na Angola se nuwe infrastruktuur wat nie net die land nie, maar ook die vasteland omskep.Volgens die minister spog die land ook met “een van suidelike Afrika se grootste internasionale lughawens, grootskaalse konferensiegeriewe en die Lobito-korridor”, wat Angola as ’n strategiese deurgangsroete vestig. Laasgenoemde verbind die Atlantiese Oseaan met Afrika se binneland en verhoog sodoende handel, toerisme en beleggings oraloor die vasteland. Tydens die opening van ITB Berlin 2026 het hy beklemtoon hoe toerisme ’n kernelement van Angola se ekonomiese diversifikasie is, met die doel om langtermyn- en stabiele waardetoevoeging verder as die oliebedryf te skep. Met verwysing na een van die sleuteldryfvere van vanjaar se ITB Berlin en volhoubaarheid, het Lopes Daniel gesê dit is die hart van Angola se toerismestrategie.Ekonomiese veerkragtigheid, maatskaplike insluiting en ekologiese verantwoordelikheid is, volgens hom, belangrike dele van die rigting wat ontwikkeling in die Angolese toerismebedryf tans inslaan. Die land se jong bevolking en demografie is ook ’n groot bate, terwyl toerisme ook goeie vooruitsigte vir werksgeleenthede bied, het hy gesê. Dit sluit die hotel-, kultuur-, en dienssektore sowel as kreatiewe bedrywe in. Die fokus word veral geplaas op opleiding, entrepreneurskap en gemeenskapsgebaseerde modelle wat ontwerp is om plaaslike waardetoevoeging te bevorder. Onder die vaandel van “The Rhythm of Life” het hy verteenwoordigers en deelnemers aan ITB Berlin 2026, wat vandag ten einde loop, aan Angola se handelsmerk vir die land se toerisme bekend gestel – kultuur, musiek en dans, diverse natuurlike skoonheid en energieke gemeenskappe. Lopes Daniel het beklemtoon sy land is in die proses om homself as ’n outentieke, kultuurryke bestemming met groot potensiaal te vestig, iets wat tans nog onderontwikkel is. Hy het besoekers en verteenwoordigers aangespoor om Angola beter te leer ken buite ITB Berlin en verder.Lopes Daniel het ook ’n beroep gedoen vir vennootskappe, belegging en sterker internasionale dialoog om gesamentlik die ontwikkeling van die toerismebedryf te bevorder. Angola word ook deur Allicia Santos, die generaal-direkteur van die instituut vir die bevordering van Angola in Berlyn verteenwoordig. Network Media Hub (NMH) en Enjoy Travel wat die ITB Berlin 2026 tans bywoon, is as media- en toerismevennote by Angola se stalletjie verwelkom met die gemeenskaplike doel dat die twee lande mekaar in hul pogings tot die bevordering van toerisme onder die vaandel van Beyond Borders kan ondersteun en bemark. – fsteffen@nmh-hub.com.na #EnjoyMyITB2026

Angola gasheer van ITB Berlin 2026

Kommentaar

Republikein 2026-03-05

Meld asseblief aan om kommentaar te lewer

Angola gasheer van ITB Berlin 2026

Kommentaar

Republikein 2026-03-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.