Aankomste styg met 95%

Namibië het meer as 1,05 miljoen buitelandse aankomste in 2023 aangeteken, ’n reusetoename van 95,4% van die 593 601 in die vorige jaar. Byna 82% hiervan was toeriste. Die aantal toeriste wat Namibië in 2023 besoek het, is 87,4% hoër as die vorige jaar. Verlede jaar het 863 872 toeriste Namibië besoek teenoor 461 027 in die vorige jaar. Dié syfer bring Namibië op ’n herstelkoers van 54% te staan vergeleke met die aantal toeriste-aankomste vir 2019 voor die Covid-19-pandemie.Die minister van die omgewing, bosbou en toerisme, Pohamba Shifeta, het die syfers gister tydens die bekendstelling van die verslag oor toerismestatistiek vir 2023 aangekondig.Van die 1,05 miljoen buitelandse aankomste was 81,9% toeriste. Sowat 14% was dieselfdedag-besoekers (same-day visitors), 3,3% was inwoners wat teruggekeer het en die oorblywende 0,7% was besoekers wat die land om ander redes besoek het.Shifeta het gesê dié noemenswaardige toename toon dat Namibië geleidelik as ’n toeristebestemming groei.“Boonop dui die herstelkoers, hoewel effens stadig, daarop dat die pogings van die regering en die private sektor positiewe uitkomste lewer. Die gaping na totale herstel is slegs 46%. Ons hoop om dit drasties te verminder na die einde van 2024 se toerismeseisoen.”AFRIKA EN OORSEELuidens die verslag dra die Afrika-mark grootliks by tot die groei in Namibië en is verantwoordelik vir 71,8% van die totale toeriste-aankomste.Die hoofbronne van toeriste na Namibië vir 2023 was besoekers van Suid-Afrika (349 729), Angola (112 336), Duitsland (79 989), Zambië (56 243) en Botswana (56 157).Die verslag het ook ’n toename van 18,4% in die aantal oorsese toeriste aangetoon. Die aantal oorsese aankomste was 243 205, wat 28% van die totale toeriste-aankomste vir die jaar verteenwoordig.“Ondanks wêreldwye uitdagings het Namibië steeds internasionale besoekers gelok met die Europese mark wat verantwoordelik was vir 21,5% van die aankomste.”Volgens die verslag het die Amerikaanse mark egter &#039;n kleiner deel van net 4% van die totale toeriste-aankomste uitgemaak wat die potensiële geleenthede vir verdere groei in oorsese markte beklemtoon.REDES Die primêre rede vir toeriste-aankomste in Namibië in 2023 is as “vakansie” aangedui en dit het 49,1% van besoeke uitgemaak. Die rede wat die tweede meeste mense aangedui het, was om by vriende en familie te kom kuier en dit het 31,3% van die aankomste uitgemaak. Aankomste vir besigheid, vervoer en ander doeleindes het onderskeidelik 15,8%, 3,6% en 0,2% beloop.Wat ontspannings- en vakansiedoeleindes betref, was die meerderheid van Suid-Afrika (160 621), Duitsland (71 172) en Angola (33 699). Met betrekking tot sakedoeleindes het Suid-Afrika (80 568), Zambië (13 342) en Zimbabwe (9 653) egter die voortou geneem.Duitsland, die Verenigde State van Amerika (VSA) en die Verenigde Koninkryk (VK) het die grootste deel van oorsese vakansiegangers uitgemaak en vir sakedoeleindes was dit die VK, Duitsland en China. VISIE VIR DIE TOEKOMSShifeta het gesê die toerismebedryf moet ook die uitdagings erken wat hom vandag in die gesig staar. “Die wêreldwye ekonomiese landskap, klimaatsverandering en sporadiese veiligheidskwessies beïnvloed steeds ons toerismebedryf.”Volgens Shifeta is hul visie vir die toekoms om Namibië tot die voorste toerismebestemming in Afrika suid van die Sahara en selfs verder te bevorder. “Ons beoog om ons infrastruktuur verder te verbeter, dienslewering op te skerp en om Namibië wêreldwyd te bevorder.”Die strategieë om dit te bereik is volgens hom om die land se toerismeportefeulje uit te brei om nismarkte soos sporttoerisme, mediese toerisme en konferensietoerisme in te sluit.Verder sal daar gefokus word op die bevordering van volhoubare toerismepraktyke om natuurlike hulpbronne en kulturele erfenisse te bewaar en tegnologie sal ook verbeter word om die toeriste-ervaring in terme van besprekingsprosesse tot virtuele toere op te skerp wat die land se bestemmings aan die wêreld sal ten toon stel. – republikein@republikein.com.na

Aankomste styg met 95%

Kommentaar

Republikein 2026-05-05

Meld asseblief aan om kommentaar te lewer

Aankomste styg met 95%

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.