Toep bied kleur en klank vir gestremdes

“Connect Africa is ’n toepassing wat inligting toeganklik maak vir mense met visuele en gehoorprobleme. Die toepassing dien ook in verskeie ander situasies as ’n oorbrugging, byvoorbeeld vir persone met disleksie,” verduidelik Connect Africa se stigter, mnr. Harry Rheeder, wat self blind is. Die Connect Africa toep is Old Mutual se nuutste wenner van die OM Seed-kompetisie. Dit kan onder meer Namibiese geldnote skandeer en vir die gebruiker sê watter denominasie die geldeenheid is. Foto’s van geskrewe teks kan ook hardop voorgelees word. “Taxibestuurders kan byvoorbeeld nie meer ’n blinde persoon om die bos lei nie. Blinde persone kan nou ook makliker die advertensies vir vakante werkposte in die kleinadvertensiekolomme in die koerant opsoek, wat nou ook vir hulle toeganklik is,” sê Rheeder. “Die toepassing is in staat tot kleurwaarneming, so wanneer jy jou klere uitkies, kan jy die kleure wat jy aantrek uitken. Dit is regtig vir my baie belangrik. Die mense wat hierdie toepassing gebruik, kan nou meer en meer onafhanklik raak,” sê Rheeder. Sy medestigter, mnr. Thimoteus Nangombe, verduidelik: “Hierdie konsep is ook deur my suster se gehoorverlies geïnspireer.“Deur my grootwordjare, hoe meer ek na oplossings gesoek het, hoe meer het ek besef dit is nie net mense met gehoorprobleme wat ’n platform nodig het om te kan kommunikeer sonder ’n volgende persoon nie, maar verskeie mense met verskillende gestremdhede.”Nangombe glo hierdie toepassing kan ook persone met gehoorprobleme bystaan in gevalle waar daar nie ’n gebaretaaltolk beskikbaar is nie. “Vir hulle om toegang te hê tot inligting hang af van ’n beskikbare gebaretaaltolk en daar is min van hulle in die land, so hulle kan nie by elke geleentheid beskikbaar wees nie en daarom het die dowe gemeenskap nie altyd toegang tot inligting nie,” sê Nangombe. Die Connect Africa-toepassing kan gratis van Google Play afgelaai word. Nangombe glo hierdie tegnologie is ’n baanbreker vir Namibië, maar dat ’n gebrek aan infrastruktuur die aantal gebruikers kan beperk. “Ons moet nog baie doen in terme van tegnologie. Die wêreld beweeg nou oor na papierlose stelsels, so dit is waar ons sal moet uitbrei,” sê hy.

Toep bied kleur en klank vir gestremdes

Kommentaar

Republikein 2025-11-05

Meld asseblief aan om kommentaar te lewer

Toep bied kleur en klank vir gestremdes

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.