Sperdatum kom nader vir simkaart-registrasie

Aktiewe gebruikers het net tot 31 Desember kans om hulle simkaarte te registreer voor telekommunikasiediensverskaffers die gebruik van die ongeregistreerde simkaarte vir drie maande opskort. Dié drie maande is die Regulerende Owerheid vir Kommunikasie in Namibië (Cran) se laaste kans aan gebruikers om te registreer voor die betrokke simkaarte heeltemal vanaf diensverskaffers se stelsels verwyder sal word, met alle ongeregistreerde nommers wat tot niet sal gaan.Cran het verlede week in ’n mediavrystelling – uitgereik deur Jairus Kapenda, die bestuurder van kommunikasie en internasionale betrekkinge – die publiek aangemoedig om spoedig te registreer. Hy sê die registrasieveldtog is ’n nasionale inisiatief om misdaadondersoeke te vergemaklik en aanlyn handel te verbeter. Teen 15 Junie was net 795 991 van die 2,76 miljoen aktiewe simkaarte in Namibië geregistreer, of sowat 29%. Teen 30 September was dit 924 453 uit 2,78 miljoen aktiewe simkaarte (33%) en teen 30 November was 1,04 miljoen simkaarte op die registrasielys, alhoewel net 2,43 miljoen simkaarte toe nog aktief was. Die registrasiekoers was destyds dus 43%.“Daar was ’n aansienlike toename in simkaart-registrasies sedert 30 September 2023 – ’n styging vanaf 33% tot 43% teen 30 November. Dit toon ’n positiewe tendens in simkaart-registrasies by verskeie operateurs, wat op positiewe vordering dui,” sê Cran se uitvoerende hoof, Emilia Nghikembua. Sy het uitgebrei oor die opskorting van simkaartdienste en gesê: “As kliënte probeer om die diens gedurende die opskortingstydperk te gebruik, sal hulle nie kan nie en bloot ’n waarskuwingsboodskap ontvang. Gedurende die drie maande kan die diens weer geaktiveer word, en die kliënt kan die selfoonnommer gekoppel aan die simkaart behou, nadat die nodige inligting vir simkaart-registrasie verskaf is. As die opskortingsperiode verval sonder registrasie, sal die verskaffer die diens en die nommer kanselleer. Die kliënt sal dan ’n nuwe simkaart moet koop en registreer, wat sal veroorsaak dat die kliënt die vorige nommer verloor,” brei sy uit.VEREISTES Intussen het Telecom Namibia gister aangekondig dat ’n polisieverklaring of bewys van verblyf nie meer nodig is vir dié operateur se registrasieproses nie. Al wat kliënte nou moet saambring is ’n geldige identiteitsdokument, paspoort, rybewys of ’n stemkaart. Die simkaart en die toestel waarin dit gebruik word moet ook saamgeneem word. Minderjarige kliënte moet deur ’n ouer vergesel word, met ’n vorm van bewys van ouerskap. MTC se woordvoerder, Erasmus Nekundi, het verlede week ook aan Republikein bevestig dat diegene wat hulle MTC-simkaarte gaan registreer nie meer hul biometriese inligting hoef te verskaf nie. Die telekommunikasiediensverskaffer het voorheen kliënte se biometriese inligting vereis as deel van die registrasieproses. Die biometriese data word gebruik as deel van MTC se Verifi-stelsel, wat ten doel het om ’n styging in voorvalle van kubermisdaad en -bedrog te bekamp. - augetto@republikein.com.na

Sperdatum kom nader vir simkaart-registrasie

Kommentaar

Republikein 2026-09-18

Meld asseblief aan om kommentaar te lewer

Sperdatum kom nader vir simkaart-registrasie

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.