Ontwikkeling vir ruimtesentrum begin na verwagting teen volgende jaar

Die uitvoerende hoof vir die Q-Kon-groep, dr. Dawie de Wet, hoop dat die ontwikkeling van die Namibië Ruimtesentrum-projek teen die einde van die jaar of vroeg volgende jaar kan begin. "Hierdie is die heel eerste keer dat sulke geriewe in Namibië ontwikkel word en ons moet bedryfs- en reguleringstrukture in lyn bring met mekaar om die geriewe te bou en te bedryf," het de Wet op navraag van Republikein gesê. Belanghebbendes van die ruimtesentrumprojek moet voortaan met die Regulerende Owerheid vir Kommunikasie (Cran) in verbinding tree en ’n aanbod vir satelietnetwerkoperateurs voorberei sodat dit vir kontrakte met die operateurs oorweeg kan word. De Wet en die beleggingshoof vir Eos Capital, Frederico van Wyk, is dit eens dat die ruimtesentrum ekonomiese en tegnologiese verbetering sal meebring. "Toegang tot inligting sal geweldige groeipotensiaal aanspoor. Betroubare breëband (verbinding) teen bekostigbare pryse is regoor Namibië nodig," deel van Wyk. Volgens hom is daar tans ook planne om geriewe by nog twee plekke in Namibië op te rig om te sorg vir netwerkdekking landswyd. "Hierdie projek is hoofsaaklik ’n belegging tot die vestiging van gevorderde tegnologiese vermoë wat meer projekte in die toekoms kan lei in die ruimtebedryf wat tans vinnig groei," verduidelik de Wet. Die ontwikkeling van die ruimtesentrum sal ook vir Jan Alleman beter internetverbindings meebring. "Namibiërs sal die vinnigste en mees kostedoeltreffende toegang tot breëband- en internetdienste beskikbaar hê en dit net hier in Namibië," sê de Wet. Dit sal verskeie sektore bemagtig om meer doeltreffend te werk. "Die ekonomiese impak sal gesien word in die vorm van IoT (Internet of Things) en bedryfsgroei in die fasilitering van handel, onderwys en doeltreffendheid," sê van Wyk. Daarbenewens sal die ruimtesentrum ook na verwagting drie tot ses Namibiërs permanent in diens neem. Van Wyk deel dat die ruimtesentrum ook sy deel sal doen om netwerkdekking in Suider-Afrika ’n hupstoot te gee. "’n Onlangse impakontleding van die Google Equiano-studie het aan die lig gebring dat internetdekking in sub-Sahara Afrika op 26% staan in vergeleke met 40% vir Afrika," sê van Wyk. - irene-mari@nmh-hub.com.na

Ontwikkeling vir ruimtesentrum begin na verwagting teen volgende jaar

Kommentaar

Republikein 2025-04-30

Meld asseblief aan om kommentaar te lewer

Ontwikkeling vir ruimtesentrum begin na verwagting teen volgende jaar

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie