Internet word beoordeel

Namibië se regte, toeganklikheid, deursigtigheid en die betrokkenheid van belanghebbers met betrekking tot die internet in die land, word tans beoordeel. Die adjunkminister van inligting en kommunikasietegnologie, Emma Theofilus, het verlede week by die amptelike bekendstelling by die Universiteit van Wetenskap en Tegnologie (Nust) in die hoofstad, gesê 51% van Namibiërs het toegang tot die internet.“Maar wat van die ander 49%?” vra sy. Sy sê die ministerie is tans besig met ’n nasionale digitale geletterdheidsprogram wat daarop gemik is om minderbevoorregte mense sekere digitale vaardighede aan te leer. “As ’n land weet ons dat ons beduidende stappe met betrekking tot die beleid vir die ontwikkeling van tegnologie gemaak het, en deur dit te doen, word ons almal gelei deur talle internasionale instrumente. Tot dusver is ’n aantal beleide in plek gestel en verskeie ander soos die wette op nasionale digitale strategie, kubermisdaad en databeskerming is in konsepformaat,” voeg sy by.Die beoordeling word onder leiding van die Verenigde Nasies se organisasie vir onderwys, wetenskap en kultuur (Unesco) se Internet-universaliteit-aanwysers, beter bekend as die ROAM-X-aanwysers, uitgevoer. Hierdie 303 aanwysers dek amper elke aspek van internetgebruik in ’n betrokke land en in Namibië word die assesseringsproses gelei deur die Internet Society Namibia Chapter. Namibië is die eerste land in Suider-Afrika wat met die proses begin het.Volgens die adjunkminister sal ROAM-X inligting verskaf oor waar die land is in terme van beleid en die ontwikkeling van plaaslike internetstelsels, “veral met inagneming van aspekte soos menseregte, deursigtigheid, toeganklikheid en die rol en bestuur van die verskeie belanghebbers. Verder, ook een wat geslag, gestremheid, jeug en inligtingstegnologie as uiteenlopende kwessies erken waaraan aandag geskenk behoort te word, tot by die beleidvorming, benutting en praktyke van tegnologie,” sê sy.Theofilus sê tegnologie skep wanbalanse, waar sommige sektore van die samelewing aan die kortste end trek. “Ek glo daar is meer wat ons kan doen om te verseker dat ons die situasie op beleidsvlak takel,” sê sy en voeg by “die ROAM-X-raamwerk sal ons help om die slaggate op te spoor en die regte beleide in ons volgende stappe te ontwerp. Die ROAM-X-assessering – wanneer dit later vanjaar voltooi is – beloof om ’n tasbare ontleding van Internet-universaliteit te verskaf.” – augetto@republikein.com.na

Internet word beoordeel

Kommentaar

Republikein 2026-02-02

Meld asseblief aan om kommentaar te lewer

Internet word beoordeel

Kommentaar

Republikein 2026-02-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.