Instagram vir tieners op pad

Hoewel Meta, die moedermaatskappy van Facebook, WhatsApp en Instagram, Dinsdag aangekondig het dat hulle Instagram-rekeninge vir tieners gaan skep, sal hierdie kenmerk eers vanaf Januarie op Namibiese gebruikers van toepassing wees, het Meta se direkteur vir kommunikasie in Afrika, die Midde-Ooste en Turkye, Kezia Anim-Addo, bevestig.Volgens Anim-Addo beskik Meta nie oor die nodige inligting om te beraam hoeveel gebruikers in Namibië hierdeur geraak sal word nie. Met dié rekening sal tieners outomaties onderhewig wees aan strenger sekuriteitsmaatreëls op Instagram. Tieners jonger as 16 sal toestemming van ’n ouer of voog moet kry om hul veiligheidsmaatreëls te stel.Tieners sal outomaties na private Instagram-rekeninge oorgeskakel word, wat beteken dat hulle nie eenvoudig gevolg kan word nie, maar eers ’n volgversoek sal ontvang wat hulle moet aanvaar voor die volgeling die inhoud wat hulle op Instagram plaas, kan sien.Tieners sal ook onder die strengste maatreëls vir private boodskappe geplaas word en kan slegs boodskappe ontvang van mense wat hulle volg of waarmee hulle reeds verbind is. Hulle kan ook net gemerk (tag) word deur mense wat die tiener op sosiale media volg en geen sensitiewe inhoud sal aan hulle gewys word nie.Instagram sal ook na 60 minute elke dag vir tieners ’n kennisgewing stuur dat hulle die toepassing moet verlaat en sal kennisgewings van Instagram oornag afskakel en outomatiese antwoorde op persoonlike boodskappe stuur.Met hierdie verandering sal ouers en voogde kan sien aan wie hul kinders die afgelope sewe dae persoonlike boodskappe gestuur het, maar sal nie die inhoud van die boodskappe kan sien nie.Ouers kan ook die daaglikse tydsbeperking vir die gebruik van Instagram beperk en hul tiener van Instagram verban vir sekere tye van die dag. Tieners kan versoeke aan hul ouers stuur om die maatreëls te verslap.Om te verseker dat tieners nie bloot ’n verkeerde geboortedatum aan Instagram gee nie, sal hulle hul identiteitsdokument moet oplaai.Dit word vir 30 dae op Instagram se bediener gestoor en word dan uitgevee. Daarbenewens sal tieners een van twee metodes moet kies om hul ouderdom te verifieer: sosiale verifikasie (social vouching) of ’n video van hulself.Met sosiale verifikasie sal tieners Instagram-gebruikers wat ouer as 18 jaar oud is en aan sekere sekuriteitsmaatreëls voldoen, vra om hul ouderdom te bevestig.Deur ’n video te gebruik, sal ’n kunsmatige intelligensie, Yoti, hul gesigte ontleed om hul ouderdom te skat. Yoti kan glo tieners tussen die ouderdomme van 13 en 17 met 99,3% akkuraatheid identifiseer en hou nie die video nie.– irene-mari@nmh-hub.com.na

Instagram vir tieners op pad

Kommentaar

Republikein 2025-11-04

Meld asseblief aan om kommentaar te lewer

Instagram vir tieners op pad

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.