Donker kant van 'n blink meta-heelal
Sekuriteitsrisiko’s vuur kommer aan
Meta se belegging in die meta-heelal het die tegnologiebedryf aan die gons gehad, maar probleme sou kort ná Mark Zuckerberg se aankondiging opduik.
“Dit begin met die belangrikste ervaring – om verhoudings te bou,” het Meta (voorheen Facebook) se uitvoerende hoof, Mark Zuckerberg, aan miljoene volgelinge gesê toe hy sy maatskappy se betrokkenheid by die ontwikkeling van die meta-heelal, ofte wel die metaverse, aangekondig het.
Verlede jaar het Facebook sy naam na Meta verander om glo hul toewyding aan die meta-heelal te bewys.
Zuckerberg glo die meta-heelal kan ’n tweedimensionele internet vervang met ’n driedimensionele wonderwêreld waarin jou alledaagse lewe nie net vereenvoudig word nie, maar waar jou wildste drome ’n virtuele realiteit kan word.
Die meta-heelal is ’n term wat drie dekades gelede vir die eerste keer in ’n distopiese roman geskep is, en verwys na die idee van ’n gedeelde virtuele omgewing waartoe mense toegang kan kry wat verskillende toestelle gebruik.
“Jy gaan dinge van die fisieke wêreld in die meta-heelal kan inbring. Feitlik enige vorm van media wat in ’n digitale formaat vasgevang kan word, kan hier ingebring word,” sê hy.
Meta het ongeveer US$10 miljard aan die ontwikkeling van die meta-heelal bestee en ’n toegewyde meta-heelal-span saamgestel.
DEEPFAKES
Tans in die meta-heelal bestaan ’n individu se “avatar” (’n digitale weergawe van hulself) uit ’n paar hande en ’n bolyf wat rondsweef, maar soos met ’n tweedimensionele internet, is daar geen twyfel dat die metaverse se grafiese ontwerpe sal verbeter en dit sal lei tot avatars wat meer lewensgetrou voorkom.
Verskeie kenners voer aan dit sal soos olie op die “deepfake” vuur wees. Deepfake is ’n tipe kunsmatige intelligensie wat gebruik word om fopbeelde, -oudio en video’s te skep.
In “deepfake-video’s” word iemand se gesig gedokter om die gesig van iemand anders te vertoon. Dit word geskep deur tradisionele visuele effekte soos rekenaargenereerde beelde te kombineer.
Hoewel deepfakes in 2017 hoogs onwaarskynlik was, het die gevare wat dit inhou vinnig opslae in die internasionale media gemaak.
Volgens ’n berig in die Britse koerant The Guardian, ontwikkel deepfake se tegnologie omtrent net so vinnig soos sy probleme uitgewys word.
“Dit word moeiliker soos die tegnologie verbeter. In 2018 het Amerikaanse navorsers ontdek dat gesigte wat deur deepfake gemanipuleer is, nie normaal kan knip nie. Die meeste beelde wys mense met hul oë oop, dus het die algoritmes nooit geleer om te knip nie. Die navorsing is skaars gepubliseer of die gemanipuleerde gesigte het begin om hul oë te knip, volgens The Guardian.
In ’n era waar sien nie rêrig glo is nie, kan dit ingewikkeld raak vir die publiek en die media om tussen realiteit en gemanipuleerde beelde te onderskei.
Video’s van politici en kenners wat allerhande fopstellings maak, kan met die verbetering van dié tegnologie meer gereeld verskyn en openbare verwarring veroorsaak.
Vroeg in 2019 het die kunsmatige intelligensiefirma, Deeptrace, gevind dat meer as 7 000 deepfake-video’s op die internet in omloop was, en dat dié syfer enkele maande later verdubbel het.
Luidens DeepTrace se verslag was 96% van deepfakes wat aanlyn beskikbaar was pornografiese materiaal wat hoofsaaklik bekende persoonlikhede geteiken het.
Die meta-heelal sal na verwagting deepfake-tegnologie meer toeganklik vir die publiek maak en met min riglyne tans vir die beskerming van individue se privaatheid, kan hierdie tegnologie nóg makliker misbruik word.
Emilia Nghikembua, uitvoerende hoof van die Regulerende Owerheid vir Kommunikasie in Namibië (Cran), raai verbruikers van die meta-heelal aan om steeds waaksaam te wees, soos hulle tans op tweedimensionele internet is.
“Die meta-heelal hou van dieselfde sekuriteitsrisiko’s in as die bestaande webtoepassings. Dis belangrik dat individue die hoeveelheid inligting bestuur wat hulle deel, asook met wie hulle dié inligting deel.
“Ondernemings moet streng privaatheids- en sekuriteitsbeleide implementeer om die risiko van dataskending en pogings van kuberkrakery te monitor,” sê sy.
EKONOMIESE HUPSTOOT
Hoewel kommer wêreldwyd oor die meta-heelal uitgespreek word, is daar ook partye wat glo dié heelal kan die hupstoot wees waarvoor die Afrika-ekonomie al dekades lank wag.
Die koop en verkoop van digitale bykomstighede in die meta-heelal asook die handel in produkte in die fisieke wêreld deur middel van die meta-heelal kan verskeie besighede se kliëntebasis uitbrei, wat hoër winste sal beteken.
Die digitale ekonomie sal na verwagting US$300 miljard tot Afrika se bruto binnelandse produk (BBP) bydra, met 10% se groei wat voorspel word.
Veral die modemark in Afrika wat tans ’n geskatte US$31 miljard werd is, kan moontlik ’n deurbraak in die meta-heelal maak. Dit gegewe die feit dat Morgan Stanley onlangs ’n skatting gemaak het dat die virtuele modemark teen 2030 US$55 miljard sterk kan staan.
Dit volg nadat die digitale speletjie Roblox waarskynlik die pad vir soortgelyke transaksies in die meta-heelal gelyk geskraap het.
Die bekende skoenvervaardiger Nike het in November verlede jaar ’n digitale skou met die vestiging van Nikeland op Roblox aangebied, en die gesogde modehuis Gucci het ’n digitale handsak vir meer as US$4 000 op dié platform verkoop.
Gucci het sedertdien sy teenwoordigheid in Roblox se digitale wêreld verder gevestig met die stigting van Gucci Town.
AFRIKA
In Februarie vanjaar het MTN Africa die vasteland se eerste geleentheid in die meta-heelal met Africarare gekry.
Africarare is Afrika se eerste meta-heelal en stel gebruikers in staat om digitale grond in dié heelal te koop.
Bernice Samuels, MTN se hoof van bemarking het gesê: “Dis ’n opwindende oomblik vir ons terwyl ons besighede op die vasteland lei om die metaverse-mark te betree.
“Dis presies waarop ons Ambition 2025-strategie gebaseer is – die benutting van tendense wat verbruiker se digitale ervarings en betrokkenheid versterk. Ons was nog altyd aan die voorpunt van tegnologiese en digitale veranderinge en ons bly oopkop oor die opwindende geleenthede wat die metaverse vir ons en ons kliënte bied.”
Hoewel die meta-heelal vir Afrika ’n blink toekoms belowe, moet internetverbindings op dié vasteland ook in ag geneem word.
Teen die einde van 2020 was slegs 46% van die inwoners in Afrika suid van die Sahara by mobiele dienste ingeteken.
Met meer as 40% van Afrika se bevolking wat jonger as 15 jaar oud is, mag die meta-heelal ’n reuse-geleentheid vir dié jong mark inhou.
– Bronne: Forbes.com, The Guardian, African Business, MTN, Netwerk24
– [email protected]
Verlede jaar het Facebook sy naam na Meta verander om glo hul toewyding aan die meta-heelal te bewys.
Zuckerberg glo die meta-heelal kan ’n tweedimensionele internet vervang met ’n driedimensionele wonderwêreld waarin jou alledaagse lewe nie net vereenvoudig word nie, maar waar jou wildste drome ’n virtuele realiteit kan word.
Die meta-heelal is ’n term wat drie dekades gelede vir die eerste keer in ’n distopiese roman geskep is, en verwys na die idee van ’n gedeelde virtuele omgewing waartoe mense toegang kan kry wat verskillende toestelle gebruik.
“Jy gaan dinge van die fisieke wêreld in die meta-heelal kan inbring. Feitlik enige vorm van media wat in ’n digitale formaat vasgevang kan word, kan hier ingebring word,” sê hy.
Meta het ongeveer US$10 miljard aan die ontwikkeling van die meta-heelal bestee en ’n toegewyde meta-heelal-span saamgestel.
DEEPFAKES
Tans in die meta-heelal bestaan ’n individu se “avatar” (’n digitale weergawe van hulself) uit ’n paar hande en ’n bolyf wat rondsweef, maar soos met ’n tweedimensionele internet, is daar geen twyfel dat die metaverse se grafiese ontwerpe sal verbeter en dit sal lei tot avatars wat meer lewensgetrou voorkom.
Verskeie kenners voer aan dit sal soos olie op die “deepfake” vuur wees. Deepfake is ’n tipe kunsmatige intelligensie wat gebruik word om fopbeelde, -oudio en video’s te skep.
In “deepfake-video’s” word iemand se gesig gedokter om die gesig van iemand anders te vertoon. Dit word geskep deur tradisionele visuele effekte soos rekenaargenereerde beelde te kombineer.
Hoewel deepfakes in 2017 hoogs onwaarskynlik was, het die gevare wat dit inhou vinnig opslae in die internasionale media gemaak.
Volgens ’n berig in die Britse koerant The Guardian, ontwikkel deepfake se tegnologie omtrent net so vinnig soos sy probleme uitgewys word.
“Dit word moeiliker soos die tegnologie verbeter. In 2018 het Amerikaanse navorsers ontdek dat gesigte wat deur deepfake gemanipuleer is, nie normaal kan knip nie. Die meeste beelde wys mense met hul oë oop, dus het die algoritmes nooit geleer om te knip nie. Die navorsing is skaars gepubliseer of die gemanipuleerde gesigte het begin om hul oë te knip, volgens The Guardian.
In ’n era waar sien nie rêrig glo is nie, kan dit ingewikkeld raak vir die publiek en die media om tussen realiteit en gemanipuleerde beelde te onderskei.
Video’s van politici en kenners wat allerhande fopstellings maak, kan met die verbetering van dié tegnologie meer gereeld verskyn en openbare verwarring veroorsaak.
Vroeg in 2019 het die kunsmatige intelligensiefirma, Deeptrace, gevind dat meer as 7 000 deepfake-video’s op die internet in omloop was, en dat dié syfer enkele maande later verdubbel het.
Luidens DeepTrace se verslag was 96% van deepfakes wat aanlyn beskikbaar was pornografiese materiaal wat hoofsaaklik bekende persoonlikhede geteiken het.
Die meta-heelal sal na verwagting deepfake-tegnologie meer toeganklik vir die publiek maak en met min riglyne tans vir die beskerming van individue se privaatheid, kan hierdie tegnologie nóg makliker misbruik word.
Emilia Nghikembua, uitvoerende hoof van die Regulerende Owerheid vir Kommunikasie in Namibië (Cran), raai verbruikers van die meta-heelal aan om steeds waaksaam te wees, soos hulle tans op tweedimensionele internet is.
“Die meta-heelal hou van dieselfde sekuriteitsrisiko’s in as die bestaande webtoepassings. Dis belangrik dat individue die hoeveelheid inligting bestuur wat hulle deel, asook met wie hulle dié inligting deel.
“Ondernemings moet streng privaatheids- en sekuriteitsbeleide implementeer om die risiko van dataskending en pogings van kuberkrakery te monitor,” sê sy.
EKONOMIESE HUPSTOOT
Hoewel kommer wêreldwyd oor die meta-heelal uitgespreek word, is daar ook partye wat glo dié heelal kan die hupstoot wees waarvoor die Afrika-ekonomie al dekades lank wag.
Die koop en verkoop van digitale bykomstighede in die meta-heelal asook die handel in produkte in die fisieke wêreld deur middel van die meta-heelal kan verskeie besighede se kliëntebasis uitbrei, wat hoër winste sal beteken.
Die digitale ekonomie sal na verwagting US$300 miljard tot Afrika se bruto binnelandse produk (BBP) bydra, met 10% se groei wat voorspel word.
Veral die modemark in Afrika wat tans ’n geskatte US$31 miljard werd is, kan moontlik ’n deurbraak in die meta-heelal maak. Dit gegewe die feit dat Morgan Stanley onlangs ’n skatting gemaak het dat die virtuele modemark teen 2030 US$55 miljard sterk kan staan.
Dit volg nadat die digitale speletjie Roblox waarskynlik die pad vir soortgelyke transaksies in die meta-heelal gelyk geskraap het.
Die bekende skoenvervaardiger Nike het in November verlede jaar ’n digitale skou met die vestiging van Nikeland op Roblox aangebied, en die gesogde modehuis Gucci het ’n digitale handsak vir meer as US$4 000 op dié platform verkoop.
Gucci het sedertdien sy teenwoordigheid in Roblox se digitale wêreld verder gevestig met die stigting van Gucci Town.
AFRIKA
In Februarie vanjaar het MTN Africa die vasteland se eerste geleentheid in die meta-heelal met Africarare gekry.
Africarare is Afrika se eerste meta-heelal en stel gebruikers in staat om digitale grond in dié heelal te koop.
Bernice Samuels, MTN se hoof van bemarking het gesê: “Dis ’n opwindende oomblik vir ons terwyl ons besighede op die vasteland lei om die metaverse-mark te betree.
“Dis presies waarop ons Ambition 2025-strategie gebaseer is – die benutting van tendense wat verbruiker se digitale ervarings en betrokkenheid versterk. Ons was nog altyd aan die voorpunt van tegnologiese en digitale veranderinge en ons bly oopkop oor die opwindende geleenthede wat die metaverse vir ons en ons kliënte bied.”
Hoewel die meta-heelal vir Afrika ’n blink toekoms belowe, moet internetverbindings op dié vasteland ook in ag geneem word.
Teen die einde van 2020 was slegs 46% van die inwoners in Afrika suid van die Sahara by mobiele dienste ingeteken.
Met meer as 40% van Afrika se bevolking wat jonger as 15 jaar oud is, mag die meta-heelal ’n reuse-geleentheid vir dié jong mark inhou.
– Bronne: Forbes.com, The Guardian, African Business, MTN, Netwerk24
– [email protected]
Kommentaar
Republikein
Geen kommentaar is op hierdie artikel gelaat nie