Dankie en tot siens, InSight

“My krag is werklik min, so hierdie is waarskynlik die laaste foto wat ek sal kan stuur.”So is daar Maandagaand – omstreeks middernag in plaaslike tyd – op InSight se sosialemediablaaie geskryf. InSight is die Amerikaanse ruimteagentskap (Nasa) se verkenningstuig wat sedert November 2018 op Mars werksaam is, maar waarskynlik binnekort finaal sal afskakel omdat dit nie langer genoeg krag kan opwek nie. Dit aangesien Mars se stof die tuig se sonpanele bedek.Dienooreenkomstig het die tuig waarskynlik nou sy heel laaste foto van Mars aarde toe gestuur. “Moet egter nie oor my bekommerd wees nie: My tyd hier was beide produktief en rustig. As ek kan voortgaan om met my sendingspan te kommunikeer, sal ek dit doen. Maar ek gaan binnekort groet. Dankie dat julle by my gebly het!”Namibië se dr. Japie van Zyl was ook in 2008 ook ten nouste betrokke by InSight se sending na Mars as die voormalige direkteur van sonnestelselverkenning by Nasa se Straalaandrywingslaboratorium (JPL). Van Zyl was ook betrokke by die sending van Kepler-, Curiosity- en Perserverence in onderskeidelik 2012, 2018 en vóór sy aftrede in 2019.InSight spog met ’n hele rits prestasies, soos dat dit die eerste tuig was om ’n aardbewing, of eerder ’n “Marsbewing” op die rooi planeet waar te neem, die impak van ’n meteoriet op dié planeet te voel en wat wetenskaplikes baie oor die planeet se dwarrelwinde en ondergrondse lae geleer het.Dit het inligting verskaf oor Mars se kors, mantel en kern wat met behulp van seismiese golwe versamel is, terwyl dit ook binne vier jaar meer as 1 300 seismiese gebeurtenisse waargeneem het, waarvan sowat 50 sterk genoeg was dat InSight kon vasstel waar die oorsprong daarvan was. Die meeste sterker bewings kom van Cerberus Fossae, ’n omgewing wat tekens toon van onlangse vulkaniese aktiwiteite – binne die afgelope twee miljoen jaar. Die sterkste bewing wat InSight nog gemeet het, was in Mei vanjaar, wat na raming sowat vyf op die Richterskaal gemeet het en waarvan die vibrasies minstens vir ses ure lank oor Mars beweeg het. InSight het ook die oorblyfsels van ’n magnetiese veld op Mars gevind en het ook die bewings ervaar toe ’n meteoriet die planeet in 2021 getref het. Dit was een van die grootste meteoriet-impakte op Mars sedert Nasa met hul ruimteverkenning begin het en het boonop daartoe gelei dat Nasa se Mars Reconnaissance-satelliet ontdek het dat die impak ’n laag water-ys, wat onder die grond versteek was, ontbloot het.Dit is ook die tuig wat die mees uitgebreide data oor Mars se planeet verskaf het – buiten vir winde, het dit ook weerfronte, stofstorms, infraklank en boorgolwe waargeneem.InSight is een van talle sendings na die rooi planeet – Nasa het reeds 50 sendings na Mars gehad, waaronder verskeie ruimtetuie en satelliete, maar nie almal was suksesvol nie.Van Zyl was ook baie opgewonde oor Nasa se jongste sending na die rooi planeet: Die verkenningstuig Perseverance, wat verlede jaar op Mars geland het en die mees gevorderde robot is om ooit na die rooi planeet gestuur te word. Die doel van Perseverance is om te soek na enige tekens van antieke lewe op Mars, om klipmonsters te versamel en te berg en dit eindelik terug aarde toe te neem, asook om ’n paar splinternuwe eksplorasietegnologieë uit te toets. – elvira@republikein.com.na

Dankie en tot siens, InSight

Kommentaar

Republikein 2026-02-03

Meld asseblief aan om kommentaar te lewer

Dankie en tot siens, InSight

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.