Vasbeslote Eagles trek laer teen VSA

Die Richelieu Eagles sal vanoggend met heelwat meer selfvertroue vir hul tweede internasionale eendagwedstryd (ODI) teen die VSA in Oman op die veld stap.In hul eerste ODI van die jaar in die ICC Wêreldbeker Liga Twee-reeks (2024 tot 2027) het die Namibiërs laas Vrydag met 114 lopies teen die VSA verloor. Die Eagles in 40.2 boulbeurte vir slegs 179 uitgeboul. Afgelope Maandag teen Oman in Al Amerat was die Eagles opnuut vir 169 in 46.3 uitgeboul. Dit wou lyk of die geskiedenis hom soos teen die VSA sou herhaal. Maar die Eagles-bouleenheid het deur die bank ‘n kliniese vertoning soos lanklaas gelewer. Pierre de Bruyn, hoofafrigter van Namibië, het sy indrukke oor die twee botsings gegee in die opbou na vanoggend se herontmoeting teen die VSA in Al Amerat.De Bruyn het gesê: “Ons eerste toerwedstryd teen die VSA was nie die ideale begin nie. Wat teen ‘n span soos die VSA nodig was, is meedoënlose dissipline – veral met die bal in die hand. Hulle het kolwers wat binne ‘n kort tydjie die uitslag uit jou hande kan neem.“Die Eagles-spelers het goeie essensie uit die wedstryd teen die VSA geneem. Ons sal in die volgende ontmoeting teen hulle baie beter moet wees. Hoe ook al dit sy, teen Oman het ons ‘n briljante terugkeer gemaak wat ‘n vasberade poging deur ‘n vasbeslote span was.“Ek is baie trots op elke speler wat ná die verloorwedstryd teen die VSA hul hand opgesteek en die kragmeting teen Oman gewen het. Die spelers het baie gegroei en die boulers het werklik almal deur die bank meedoënloos en gedissiplineerd geboul.“Die Eagles moes 169 op ‘n baie moeilike kolfblad teen die gasheerspan verdedig, maar ons het geweet ons het ‘n kans. Om JJ Smit terug in die boulaanval te hê, het ‘n groot verskil gemaak. “Fisiek gaan dit goed met JJ, maar ons bestuur sy hoeveelheid boulwerk om sy insette so lank as moontlik vir die span te behou. Sy ondervinding en boulvernuf het iets nuuts tot ons beskikking gestel.“JC Balt het sy ODI-debuut vir die Eagles teen Oman gemaak en het volwassenheid met sy benadering tot sy kolf- en boulwerk getoon. Hy het laat vir Namibië op nommer sewe op ‘n moeilike kolfblad teen topkwaliteit draaibalboulers gaan kolf. Hy was gefokus en in beheer van sy kolfwerk om die draaiers vir ‘n onoorwonne 35 lopies aan te vat. Wanneer ‘n jong speler soos hy die kans kry en vir ons wys hoe dit gedoen word, is dit ‘n goeie teken.“JC Balt se enkelbesering wat hy tydens die wedstryd teen Oman opgedoen het terwyl hy gekolf het, is ‘n bron van kommer. Maar ons werk hard aan sy fiksheid.” TeenvoetersDie Eagles sal onder meer teenvoeters moet vind vir die VSA se Milind Kumar, die speler van die wedstryd met 54 van 34 balle, asook vier paaltjies vir 48. In die VSA se topvyf kolwers was Kumar se vyftigtal reeds hul derde, ná Andries Gous (76) en kaptein Monank Patel (65) se bydraes.Die Namibiërs sluit hul toer Sondag met hul tweede wedstryd teen Oman af.Oman het Woensdag ‘n stok in die speke van die VSA as voorloper in die reeks gesteek, deur hul kragmeting met sewe paaltjies ten wen. Die VSA is vir net 151 uitgeboul, met Oman se Shakeel Ahmed die speler van die wedstryd met vier paaltjies vir 26, voordat kaptein Jatinder Singh die tuisspan met ‘n beheersde 82 nie uit nie (127) tot die oorwinning gevoer het met 25 balle oor.– tielman@nsh.com.na

Vasbeslote Eagles trek laer teen VSA

Kommentaar

Republikein 2025-09-19

Meld asseblief aan om kommentaar te lewer

Vasbeslote Eagles trek laer teen VSA

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie