Sterk reaksie verwag met rug teen die muur

Ná verlede naweek se teleurstelling sal die Namibiese rugbyspan môre ‘n veel meer dominerende en afgeronde vertoning wil lewer in sy maak-of-breek valbylwedstryd teen die Verenigde Arabiese Emirate op die neutrale veld in Kampala.Vir die eerste keer vandat Namibië in 1990 onafhanklik geword het, het Zimbabwe se Sables dit laas Saterdag reggekry om twee opeenvolgende toetse teen die Welwitschias te wen. Die oorwinning met 30-28 in Kampala het Zimbabwe se kwalifisering vir die 2027 Wêreldbekertoernooi in Australië beklink, terwyl Namibië die langer en moeiliker ompad moet volg indien hy een van die 24 uitsoekspanne in die vergrote WB-toernooi wil wees.Network Sport Hub verneem dat die vaskopstut van FNB Western Suburbs, Gerhard Opperman, gister ook uit Windhoek vertrek het om by die groep in Kampala aan te sluit.Die losvoorspeler Riaan Grové (Sarlat in Frankryk), vleuel Quirione Majiedt (FNB Unam) en heelagter Aston Mukwiilongo (FNB Kudus) is die drietal wat reeds vandeesweek deur afrigter Jacques Burger ontbied is.Die plaasvervangers is benodig omdat verskeie van Namibië se beroepspelers by oorsese klubs en unies nie vir die ekstra week in Uganda beskikbaar kon bly nie.Selfs sonder die hoëprofiel beroepspelers, behoort Namibië nogtans die ondervinding en skietgoed en motivering te hê om in beheer van sy stryd teen die Emirate te bly. Zimbabwe het verlede jaar sy November-toer na Dubai onderneem en het met 62-22 teen die gasheerspan gewen.‘n Meerderheid van die Namibiese spelersgroep was in die 2023 Wêreldbeker in Frankryk betrokke en dit sal ‘n reusagtige skok wees indien die Welwitschias nie oortuigend met die VAE kan afreken nie.Afrigter Jacques Burger het vroeër in die week gesê hoewel vele waarnemers die span afgeskryf het, het hy volle vertroue dat die groep sal opstaan.“Waar daar hoop is, is daar ‘n weg. Ons het saam seergekry, maar ons het gesels en ons planne in plek gekry vir hoe ons van die teleurstelling gaan terugkom. Ek is trots op die ouens se houding; hulle is baie trots om vir ons land te speel en wil vir almal wys wat in ons steek.”Nuwe geskiedenis geskryfNamibië het geen vorige ontmoetings in ‘n rugbytoets teen die Emirate nie, afgesien van wyle Gerhard Mans se span van 1993 wat met 64-20 oor die destydse streekspan bekend as die Arabiese Golf in ‘n kwalifiserende WB-toernooi in Nairobi geseil het.Namibië het vandeesweek op die nuutste wêreldranglys met nog twee posisies tot 27ste gedaal, met beide Kanada (25ste) en Nederland (26ste) wat by hom verbygeseil het.Die Emirate verskyn tans in die 39ste posisie op die wêreldranglys – ‘n status wat hom min of meer in die portuurgroep van Afrika-spanne soos Kenia (35ste), Marokko (40ste), Algerië (43ste), Madagaskar (44ste) en Senegal (45ste) plaas.‘n Mens kan onthou dat die Welwitschias in Junie eers in die laaste minuut teen Uganda op Walvisbaai gewen het. Die Ugandese wat destyds ook nie op volle sterkte was nie, het vandeesweek vanaf die 48ste tot 50ste plek op die wêreldranglys gedaal.Asië-RugbyVir die eerste keer sedert 2015 is aan Asië-Rugby een plek by die Wêreldbeker deur die kwalifiseringsproses toegestaan. Met Japan (14de op die nuutste ranglys) reeds vir 2027 gekwalifiseer, is 'n nuwe span uit Asië 'n plek in die Wêreldbeker gewaarborg. Dié kwalifiseerder is deur 'n proses van drie fases bepaal, met die wenner van die derde ronde; die 2025 Asië-rugbykampioenskap, Hongkong China, wat vir die eerste keer as Asië 1 vir die Wêreldbeker gekwalifiseer het. Die naaswenner, Verenigde Arabiese Emirate (Asië 2), het deurgedring tot 'n Afrika/Asië-uitspeelwedstryd teen Afrika 2 (Namibië) om te beslis wie na die Finale Kwalifiseringstoernooi in November deurdring.Die Emirate se mees onlangse uitslae in Asië se kwalifiserende WB-toernooi in Dubai: Verloor met 10-43 teen Hongkong China (14 Junie); Wen met 38-36 teen Suid-Korea (21 Junie); Wen met 29-21 teen Sri Lanka (4 Julie).

Sterk reaksie verwag met rug teen die muur

Kommentaar

Republikein 2025-09-17

Meld asseblief aan om kommentaar te lewer

Sterk reaksie verwag met rug teen die muur

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie