Skietkodes bars van trots op Marais en jaggeweerspan

Die Namibiese Jaggeweerskietvereniging (NHRSA) vier met trots sy geskiedkundige prestasie by die jaarlikse Namibiese Sporttoekennings met twee van die mees gesogte pryse.Die nasionale jaggeweerskietspan is aangewys as sportspan van die jaar, terwyl Francois (Wors) Marais junior die gesogte toekenning as sportman van die jaar ontvang het. Die Namibiese sportspan van die jaar se lede is Marais junior, Francois Marais senior, Luandré Benade, Schalk Barnard, Wilhelm Loubser en Strydom van der Wath, wat dié sport tot in die geskiedenisboeke aangevuur het. Hul prestasie beklemtoon 'n buitengewone jaar waarin hulle internasionaal sake oorheers het. Met hul goue medalje by die 2023 kontinentale Afrika-kampioenskap en 'n uitsonderlike totaal van 8 477.8 punte het die span Suid-Afrika in Windhoek verslaan. By die vierde Wêreldjaggeweerskietkampioenskap het die span met 12 260 punte as wêreldkampioen uit die stryd getree en hul oorheersing in die sport versterk. Namibië is tans die nommer een op die wêreldranglys in jaggeweerskiet.Marais junior se toekenning as sportman van die jaar beklemtoon sy baanbrekersprestasies en sy uitsonderlike bydrae tot Namibië se internasionale sportprofiel. By die 2024 Wêreldjaggeweerskietkampioenskap naby Otjiwarongo het Marais geskiedenis gemaak deur die opeklas- en .222/.223-klastitels by dieselfde byeenkoms te wen.Dubbele wêreldkampioenPrecision Rifle Shooting-wêreldkampioenskap 2024 in die VSA: As lid van die nasionale presisiegeweerskietspan het Marais bygedra tot Namibië se tweede posisie ná die gedugte Amerikaanse span. Uit ‘n totaal van 105 individuele skuts by die wêreldbyeenkoms in presisiegeweerskiet was drie Namibiërs op die laaste dag in die valbylkompetisies vir plekke in die toptien betrokke. Ongelukkig het ‘n reënbui die kompetisie kortgeknip waarin Dirk Sauber (5de/6de plek), Francois Marais Junior (7de/8ste plek) en Keiran Mans (9de/10de plek) betrokke was.Toe die Namibiese presisieskuts twee jaar tevore hul debuut by die wêreldbyeenkoms in Frankryk gemaak het, was Dirk Sauber individueel sewende en die span ook sewende geplaas.Marais, bekend vir sy bestendige prestasie, handhaaf plaaslik die beste gemiddelde telling in jaggeweerskiet en is sedert 2016 as skut van die jaar deur die NHRSA aangewys. Hy is 'n dryfkrag agter Namibië se internasionale sukses. Sy leierskap en presisie het spanmaats sowel as jong skuts geïnspireer. Die NHRSA wens die Namibiese Presisiegeweerskietvereniging (NAPRA) se span van harte geluk, wat ook as ‘n finalis vir die sportspan van die jaar-toekenning benoem was. Hul merkwaardige prestasies op die internasionale verhoog het trots na Namibië gebring en die ongelooflike diepte van talent in die skietsportgemeenskap ten toon gestel. Leeftyd geëer'n Ware legende in Namibiese sport, Hasso Ahrens, word ook gevier as ontvanger van die Sportkommissie gesogte Lifetime Achievement Award. Hasso se uitsonderlike nalatenskap strek oor sowel sy sukses as sokkerspeler en sy onskatbare bydraes tot skietsport as afrigter en administrateur. As administrateur van die Skietunie het sy onvermoeide pogings Namibiese skietsport stewig in die internasionale kollig gehou. Sy toewyding, visie en passie is oorgedra na sy dogter Gaby, die driemalige Olimpiese kleiduifskut wat verlede week tot visepresident van die Namibiese Nasionale Olimpiese Komitee verkies is.Die NHRSA- en NAPRA-spanne het beduidende uitdagings te bowe gekom en het ongeëwenaarde vasbeslotenheid, dissipline en passie getoon. Hul sukses, tesame met die prestasies van Hasso Ahrens en Gaby Ahrens, is 'n voorbeeld van die uitnemendheid en eenheid binne Namibië se skietsportgemeenskap.Francois Marais senior, die NHRSA-voorsitter sê: “Dis 'n oomblik van ontsaglike trots vir Namibië. Die NHRSA-span, Marais junior, die NAPRA-span en Hasso Ahrens het bewys dat Namibiërs op die wêreldverhoog kan uitblink en inspireer. Hierdie toekennings is 'n viering van hul gesamentlike harde werk en toewyding tot uitnemendheid. “Hierdie toekennings is 'n belangrike mylpaal vir Namibië, wat die profiel van skietsport verhoog en die ongelooflike potensiaal van Namibiese atlete op die wêreldverhoog demonstreer.”Met hul visier op toekomstige kampioenskappe gerig is die NHRSA en Marais junior vasbeslote om op hul momentum voort te bou. Hul reis is 'n bron van trots en inspirasie vir elke sportkode in Namibië. – tielman@nsh.com.na

Skietkodes bars van trots op Marais en jaggeweerspan

Kommentaar

Republikein 2026-02-03

Meld asseblief aan om kommentaar te lewer

Skietkodes bars van trots op Marais en jaggeweerspan

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.