Rosemarie voeg silwer by swemmers en stoeiers se medaljes

Die Namibiese fietsryer Rosemarie Thiel het die silwermedalje in die individuele tydtoets vir meisies ingepalm by die Vereniging van Nasionale Olimpiese Komitees van Afrika (ANOCA) se geskiedkundige eerste Afrika Skolespele in Algerië.Thiel het Dinsdagnamiddag die podium gedeel met die gouemedaljewenner Joudy Elsayed van Egipte en die derde geplaaste Mercy Eragae van Kenia.Die baan was ‘n sirkelroete van 7.1 kilometer, wat Thiel in 12 minute 40.56 sekondes voltooi het. Elsayed van Egipte (12:32.41) was die enigste ryer wat ‘n vinniger tyd opgestel het, met die Keniaan derde in 13:09.05.In die seuns se individuele tydtoets was Sean Lowe (vierde; 10:27.35) en Marco Thiel (vyfde; 10:38.93) se tye ietwat agter die topdrie van Tunisië, Egipte en Algerië nie. Die wenner was Youssef Chehaibi van Tunisië (10:16.78).Die fietsryspan se afrigter Carolin Janik vertel: “Nadat ons Maandag op die roete gaan oefen het, het ons (Dinsdag) by die wegspring besef ons oefenlopie was verkeerdom (kloksgewys). Ons was saam met die Egiptiese span. So dit was ’n redelike skok vir ons. “Toe het ons min tyd vir opwarming; ek het ook nie die lys ontvang met die wegspringtye nie en ek het self uitgewerk wanneer hulle moes wegspring. “Marie het vooraf geen idee gehad hoe sterk die ander ryers sou wees nie. Sy het goed weggespring en het 100 persent gegee. “Sy het agterna gesê sy het goed gevoel; sy was sterk. Gelukkig het ons geweet waar die slegte plekke op die pad is en sy kon dit goed vermy. Sy het net agt sekondes agter die wenner klaargemaak. “Die prysuitdeling was vir haar ’n groot belewenis. Alles en almal fokus net op jou; ons vlag word gehys en dis so ’n warm ervaring. Sy het dit nie verwag nie, hoewel ons eintlik geweet het sy het ’n kans om die podium te haal. Sy het agterna gesê dit was so mooi en spesiaal. “Vir my, ek is ongelooflik trots op haar. Dis vir my ’n groot voorreg om hier saam met die kinders te wees. Ek was deel van die proses; hulle liefde vir die sport het by my begin daar rondom 2014. Dit doen my hart goed om te sien hoe hulle almal sterk gegroei het in die sport.”TydtoetsNamibië se volgende geleentheid is vanmiddag, wanneer Marco Thiel, Sean Lowe en Christian van der Westhuizen in die spantydtoets meeding.Die padresies vir meisies is Vrydagoggend (ses rondtes van 7.1 km; totaal 42.6 km) en die padresies vir seuns is Saterdagoggend (agt rondtes van 7.1 km; totaal 56.8 km). Die roete is dieselfde as in die individuele tydtoets, maar dié keer wel kloksgewys soos tydens die Namibiërs se eerste oefenlopie.Janik het gisteroggend bygevoeg: “Ons is besig met ’n reconnaissance op die roete vir die spantydtoets (vandag, 31 Julie). Die eerste wegspringtyd is weer 16:00 plaaslike tyd (in Namibië 17:00). “Tunisië spring eerste weg (16:00), Egipte drie minute later, ons seuns derde (16:06) en Algerië (16:09) is die enigste ander span wat ingeskryf is. Die derde ryer oor die eindstreep se tyd tel vir die span.”Nog medaljesDinsdagmiddag het die Namibiese Stoeifederasie sy derde bronsmedalje van die Spele gevier, toe Henrico du Rand in die 55 kg vrystyl die derde plek beklink het.In die klein span van net drie stoeiers het Shithigona Shipopyeni (55 kg) en Petrus Haibodi (60 kg) Maandag die Spele se eerste twee bronsmedaljes vir Namibië in hul gevegte in die Grieks-Romeinse kategorie ingepalm.&bull; Die Namibiese swemspan het ook reeds sy stempel begin afdruk, met drie medaljes sover.Victoria de Sousa het uitgeblink met twee silwermedaljes, in die 400 meter wisselslag en 50 vryslag. Haar spanmaat Rodney Alexander Feris het die bronsmedalje in die 50 vlinderslag verseker.&bull; Die Spele se program in baan- en veldatletiek begin Vrydag. Die Namibiese Nasionale Olimpiese Komitee het ook spanne in perdesport (begin vandag) en boks, asook ‘n enkele gimnas. Die artistiese gimnas Zine-Edine Meziane se deelname begin vandag.

Rosemarie voeg silwer by swemmers en stoeiers se medaljes

Kommentaar

Republikein 2025-11-03

Meld asseblief aan om kommentaar te lewer

Rosemarie voeg silwer by swemmers en stoeiers se medaljes

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.