Kampioen teen voorloper: WHS reis na Doringlaagte

Die slot Keanan Louw op die aanval vir Samsung Windhoek Hoërskool tydens hul oorheersing met 61-18 teen InSpares Pro-Ed Akademie op die WHS FNB Vegkopstadion laas Saterdag. Die WHS Koedoebulle, die heersende kampioenspan in die NSSR onder 19 premierliga, is tans onoorwonne ná vier wedstryde, terwyl die Bere van OK Foods Moria Privaatskool tans die voorloper met volpunte uit hul vyf wedstryde tot dusver is. WHS en Moria se paaie kruis Saterdag met hul botsing op die noordespan se tuisveld Doringlaagte op Outjo. Nog twee gevaarlike buiteperde raak ook slaags wanneer die King Price Windhoek Gimnasium Leeus (verslane finalis in 2024) die reis noord aanpak om teen Compack Tsumeb Gimnasium (tans tweede) te staan te kom. Elk van dié twee spanne het sover een keer vanjaar vasgeval – onderskeidelik teen WHS en Moria. Aan die kus sal die derby tussen Namib Diesel Walvisbaai Privaatskool en die Swakopmunders Pro-Ed Akademie (12:00 by Naartjiepark) ook heelwat belangstelling gaande maak. Wedstryd 4 is op Stampriet, waar Farmstyle Elnatan hom gereed maak vir sy tuisstryd teen Autohaus Windhoek Affies. Foto Floris van Schouwenburg