Eerste kapteinsbeurt vir Mekelaye bring oorwinning

Die Capricorn Eagles het Maandag in ’n spanningsvolle tweede T20-kragmeting – wat tot in die laaste boulbeurt in die weegskaal was – net-net daarin geslaag om ’n oorwinning van twee lopies te behaal teen die Ierse o.19-vrouekrieketspan, wat tans op toer is.Die 21-jarige Mekelaye Mwatile, wat vir die eerste keer as kaptein vir Namibië opgetree het, het die voortou geneem met ’n onoorwonne 53 lopies van 47 balle. Sy is by die HP Oval as die speler van die wedstryd aangewys.Die tuisspan het 126 lopies vir die verlies van ses paaltjies aangeteken nadat hulle besluit het om eerste te kolf. Kayleen Green het 25 lopies van 21 balle behaal, en Edelle van Zyl het later 20 lopies van 19 balle bygedra; maar dit was Mekelaye Mwatile – wat in die vierde posisie gekolf het – wat beheer oor die kolfbeurt geneem het met ’n onoorwonne vyftigtal.Die Ierse span het ’n ernstige terugslag gekry toe hulle beide hul aanvangskolwers met opeenvolgende aflewerings verloor het. Charlotte Weber (3) is deur Mekelaye Mwatile uitgehardloop, waarna Rebecca Lowe (19 lopies van 17 balle; 2 viere, 1 ses) deur Edelle van Zyl gevang is van Sarafia Handiba se boulwerk.Ierland se herstel is aangevuur deur hul kaptein en nommer drie-kolwer, Alice Tector, wat ’n onoorwonne vyftigtal (52 lopies van 47 balle; vyf viere) behaal het. Aisling Lawlor het gesukkel om 11 lopies van 25 balle aan te teken (sonder enige grenshoue) voordat Victoria Hamunyela haar van haar eie boulwerk uitgevang het.Niamh Lowry (22 lopies van 20 balle; 3 viere) het goed presteer om die Ierse span binne trefafstand te bring. Die toerspan het tien lopies uit die laaste boulbeurt benodig, maar Lowry is van die vierde aflewering deur Mekelaye Mwatile gevang en geboul.Alhoewel Lowry se opvolger, Genevieve Morrissey, die laaste bal vir ’n grenshou geslaan het, het die besoekers steeds met twee lopies te kort geskiet.Afrigter Gerhard Lötter se Namibië-span het hul gereelde kaptein, Sunè Kotze-Wittman, ‘n blaaskans gegee. Dit is vooraf ooreengekom dat Mekelaye tydens die huidige reeks met tye die rol as medekaptein sal begin inneem.Die Eagles span ook in die reeks verskeie nuwelinge bekend. Spelers soos Alexa Vorster, Jani-Mari van Heerden, Hileni David, Kiana de Jager, Monique Muller en Sarafia Handiba kry speelkans saam met die gevestigde nasionale spelers.• Die volgende twee wedstryde in die reeks van ses word albei Woensdag (om 09:00 en 14:00) by die HP-ovaal in Olympia gespeel, voor die laaste twee wedstryde wat beide Saterdag voorlê.Namibië het die openingswedstryd Sondag met 50 lopies (DLS-metode) gewen.

Eerste kapteinsbeurt vir Mekelaye bring oorwinning

Kommentaar

Republikein 2026-10-28

Meld asseblief aan om kommentaar te lewer

Eerste kapteinsbeurt vir Mekelaye bring oorwinning

Kommentaar

Republikein 2026-10-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.